Scol Preparatorio Tarcisius ta cu maximo esfuerso pa mucha haya les digital

Asina a duna di conoce su cabesante, juffrouw Angela Romero durante un entrevista pa Bon Dia Aruba, na unda el a splica cu nan a cuminsa duna les digital interactivo for di varios siman caba. M mayoria di scol preparatorio ta haciendo nan maximo esfuerso pa yega e muchanan via medionan digital.

Den e caso di Scol Preparatorio Tarcisius, Romero a expresa cu nan ta tene contacto cu muchanan y mayornan via video call. Tambe nan ta manda documentonan cu formato PDF, asina tambe via WhatsApp pa e mayornan cu no tin otro aparato of acceso diferente.

“Nos a crea un Google Classroom pa cada klas, eyriba maestranan ta upload PDF cu nos ta traha hunto den team. Tambe ta interactua cu e muchanan door di diferente video, cantica etc,” Romero a sigura.

Ademas, el a duna di conoce cu nan meta principal ta pa por brinda e muchanan weganan educativo, obra di man, ehercicionan di relahacion enfocando riba paz mental di e muchanan y di mayornan. Pa asina nan por comparti hunto, hunga hunto y siña sin sa cu nan ta siña. Pues pa medio di wega.

Tocante e actividad, el a comenta cu nan ta comparti documentonan den PDF cu varios actividad, nan ta splica esaki den idioma Papiamento pa tur mayor por compronde y alabes nan ta duna instruccion y motiva e mayornan pa haci 1 of 2 actividad pa dia. Teniendo na cuenta cu :

1. Cas no ta scol

2. Tin algun mayor cu ta traha

3. Mayornan ta sinti preocupa y no tin cabes pa guia e muchanan.

4. Tin algun mayor cu si tin e capacidad pa yuda e yiu y algun otro no.

Importante ta pa menciona cu nan no ta manda werkblad, pero si weganan didactico, interactivo, educativo, cu mayor por uza material cu nan tin na cas sin cu tin cu sali for di cas y bay cumpra.

Tocante e flexibilisacion di medidanan cu Gobierno di Aruba a implementa pa negoshinan y otro sector, nos a puntra si scolnan den futuro cercano lo por cuminsa cu un cantidad chikito di mucha, pa asina nan por adapta cu e ‘nomal nobo’ cu ta na caminda. Pa cu esaki, Romero a menciona cu scol preparatorio por cuminsa cu di 5 pa 8 mucha den klas, dependiendo di e grandura di e lokaal. No mas cu 8 mucha, pa motibo cu nan tin cu cumpli cu e regla di 2 meter di distancia y no lo por mas cu esey.

Tambe, el a señala cu muchanan por transporta e virus inconscientemente. Segun un articulo cu el a lesa, nan ta mishi cu superficie y otronan, y principalmente den scol preparatorio muchanan no ta domina norma di higiena ainda. Nan ta hopi dependiente di nan maestra y adulto ta hopi vulnerabel, loke ta nifica cu no ta conseha esaki te ainda.