Durante e temporada di Shelter in Place, relaciona cu e crisis di COVID-19, Fundacion Parke Nacional Aruba (FPNA) ta experiencia un aumento den cantidad di bishitante cu ta recrea den Parke Nacional Arikok y tambe na e sitio Ramsar Spaans Lagoen.
Bou di e condicionnan existente di Shelter in Place, FPNA a cera su operacion diario, pero ta habri pa tur esunnan cu deseo di recrea den naturalesa, conforme regulacionnan di DVG. Esaki tambe pa motibo cu a cera Parke Nacional Arikok pa vehiculo cu motor. Cu Shelter in Place, trabou di FPNA a keda limita na vigilancia y control tactico pa evita crea aglomeracion entre bishitante y sigura cu tur bishitante ta tene nan mes na nos regla y regulacion. FPNA ta controla y vigila areanan bou di proteccion cu un team minimo di Park Rangers, caminda cu siguridad di tur cu ta bishita Parke Nacional Arikok y sitio Ramsar Spaans Lagoen ta na prome luga.
Door di mustra respet pa reglanan y regulacionnan stipula door di FPNA den areanan protegi, e bishitante ta aporta na proteccion y conservacion di Aruba su naturalesa; ademas observacion di nos reglanan ta percura pa siguridad propio y di otro durante un recreo den naturalesa. Ta sumamente importante pa na tur momento sigui instruccion di nos Park Rangers. Si no cumpli cu reglanan of instruccion di Park Rangers, nan tin autoridad pa exigi e bishitante pa bandona e area protegi.
Durante fin di siman a tuma nota di un incidente lamentabel na Conchi, caminda bishitantenan a dicidi di toch bay landa den Conchi – despues di a wordo avisa di antemano pa bo bay haci esaki. Pa bon fortuna no tabatin consecuencia fatal, pero un incidente como tal no lo a tuma luga si a sigui regla y instruccion. FPNA y su Park Rangers tin hopi aña di experiencia cu ta reconoce momentonan cu ta peligroso pa drenta den Conchi.
FPNA kier recorda tur persona un bes mas cu ta prohibi recrea cu bestianan domestico den areanan protegi. Stroba, gara of colecta animal, mata of obhetonan ta estrictamente prohibi pa ley. Na tur dos area tin borchi ta indica e regla y regulacionnan na cual bishitante mester tene nan mes. E regla y regulacionnan tambe ta accesibel via e website www.arubanationalpark.org.
E areanan protegi ta herencia di nos tur y hunto nos tin e responsabilidad di protege y conserva esaki pa e futuro generacion. FPNA ta reconoce e balor cu naturalesa tin den e momento dificil aki, pero ta recorda tur persona pa recrea den naturalesa na un manera responsabel na tur momento. Pa cualkier pregunta of pa reporta iregularidad den e areanan protegi, por tuma contacto cu FPNA riba e pagina di Facebook: Aruba National Park.
