Awe mainta tempran e barco di Marina Real “Karel Doorman” a drenta nos waf di Oranjestad cu un cantidad di ayudo medico y ekipo cu Hulanda a manda pa atende cu e pandemia di e coronavirus/Covid-19.
Personal militar di Marina Real a cuminsa baha tur e carga di ayudo aki, pero tambe material pa marinierkazerne. Director di Aruba Port Authority, Marc Figueroa tabata hopi cauteloso pa bin den detaye riba contenido di e barco. Ya cu esaki lo pasa riba nivel di crisis team y tambe riba tereno diplomatico. APA unicamente ta coordina e parti di entrada y salida di e barco cu a bin pa un dia so. Tur esaki pa cumpli cu e proceso di siguridad operacional di APA pa acomoda e barco militar aki. Pues detaye di e carga esey ta keda den man di crisis team di gobierno, el a bisa. Sinembargo e ta haya cu ora nos tin un barco den nos waf cu ayudo, e ta mustra algo positivo pa Aruba tambe, mirando cu ayudo ta drentando pa combati e Covid-19.
