Awor cu gobierno ta papiando di flexibilisa e medidanan adopta pa contene e contagio di e coronavirus/Covid-19, sindicato FTA ta haya cu sector di construccion mester haya prioridad. E mester wordo exclui for di e lista di no esencial durante e shelter in place.
WAB cu ta representa varios compania di construccion a yega di expresa su preocupacion prome y despues cu nos pais a conoce e crisis di Covid-19 relaciona cu desaroyo di e sector aki. Presidente di FTA, Hubert Dirksz a declara na Bon Dia Aruba cu sector di construccion por trece un alivio pa nos economia, ya cu e ta emplea hopi hende. Pues nan mester haya su prioridad, mirando cu turismo a cay y gobierno a decreta e lockdown.
El a bisa cu for di e prome dia cu nan a reuni cu minister di Labor, Glenbert Croes, conhuntamente cu otro invitadonan, ora cu alarma a wordo bati riba e prome casonan di Covid-19, caminda mester a cera nos frontera, nan a referi riba sector di construccion. FTA a informa cu nan ta haya hopi importante y nan a pidi pa laga e sector di construccion ultimo pa cera of stop di traha. Pero tambe pa nan laga e sector aki prome pa cuminsa draai, manera e situacion local ta permiti y prome cu nos frontera ta habri bek. “Esey ta yuda pa un movecion di placa,” el a bisa.
Aunke tin algun trabao cu ta wordo haci, e ta kere cu mester por habri un poco mas. FTA ta spera cu e siman aki cu ta wordo constata cu e contagio di e virus ta kedando abao. Pues esey ta nifica cu nos tin espacio pa cuminsa habri gradualmente. “Mi ta sugeri cu e prioridad ta poni pa e parti di construccion,” asina e sindicalista a bisa.
P’esey awor cu gobierno a anuncia cu lo cuminsa flexibilisa gradualmente e medidanan cu nan a introduci pa contraresta e transmision di e virus aki, ta bon pa nan duna prioridad na e sector di construccion. Como sindicato, presidente di FTA ta haya cu mester reactiva e sector di construccion.
FTA a yega di pone den nan carta pa esaki tuma luga, ya cu no solamente e ta afecta economia, sino entrada di hopi famia locual ta kita un tiki di dolor di cabes cerca esnan cu ta traha den e sector aki. E carta cu e ta referi na dje tabata dirigi na prome minister Wever-Croes relaciona cu tur e situacion di finanzas publico y problemanan di e trahadonan di e sector priva, y e medidanan cu mester wordo tuma. Den e carta ey -segun e sindicalista- FTA ta sugeri pa mientras tanto construccion mester cuminsa opera.
Presidente di FTA a indica cu tin construccion di casnan cu ta tumando luga. Ademas di proyectonan hotelero grandi manera The Secret Baby Beach y otro cu kier haci nan ampliacion cu ta wardando pa tur permiso bin cla. “Mi ta kere cu mester duna espacio pa nan continua,” el a declara.
El a bisa cu si akinan nos ta referi na placa cu mester bin di afo pa trabou por wordo haci, e ta haya cu ta importante pa un reapertura di e sector di construccion tuma luga, pasobra nos mester di e divisa.
