Parlamentario Alan Howell(POR): ‘Contento cu ta existi e posibilidad pa entrega 25% di salario’

Parlamentario Alan Howell ta comenta cu durante reunion publico den Parlamento hunto cu e sindicatonan siman pasa, ta hopi informacion y opinion a wordo intercambia. Sindicatonan a pidi Parlamento un reunion pa scucha cuanto e parlamentarionan ta bay entrega pa ta solidario cu pueblo den e situacion di crisis cu nos ta bibando aden pa loke ta Covid-19. Loke e sali na cla ta cu parlamentarionan di Aruba ta bay entrega por lo menos 20% di nan salario.

Pero na mes momento, siguiendo su declaracion di siman pasa, Alan Howell a indica na e sindicadotnan cu ta berdad cu el a propone pa entrega 25% di salario di tur parlamentario. Durante e encuentro publico den Parlamento tabata un gran satisfaccion pa parlamentario Howell scucha cu tin e disponibilidad di e fraccionnan presente pa entrega mas di 20% cu por bira 25%. Parlamentario di POR a pone enfasis cu esnan cu tin un salario mas halto ta e promenan cu mester contribui y sigur prome cu yega na esnan cu un salario chikito. Den caso unico aki unda nos tur mester contribui esnan cu schouder mas hancho mester contribui un porcentahe mas halto cu esnan cu schouder mas chikito, ta opinion di Alan Howell.

Durante un siguiente reunion publico pa atende e tema lo tin un debate pa sa kico lo entrega finalmente, pasobra na final nos ta den un estado democratico y ta mayoria ta esun cu ta dicidi. Segun Howell e tabata un bon reunion caminda hunto tur presente a pone Aruba na prome luga.