Manera Bon Dia a trece dilanti den un edicion anterior, 11 mil persona a registra pa ricibi e ayudo temporal di gobierno FASE, pero despues di pasa evaluacionnan individual, a resulta cu solamente 4 mil persona ta bin na remarke pa e ayudo. Minister Xiomara Ruiz-Maduro a splica cu entre otro, esaki ta debi na e echo cu den mundo comercial tin e fenomeno cu ta emplea trahado ‘zwart’.

E minister encarga cu asuntonan economico a trece esaki dilanti den un conferencia di prensa, bisando cu el a haya permiso di su colega di labor Glenbert Croes pa aclaria na mundo comercial cu FASE tin algun obstaculo cu ta bin netamente di mundo comercial ‘cu ta mustra cu tin cosnan cu no ta cuadra’. “Na momento cu bo kier duna un yudansa, bo mester percura cu e yudansa por yega na esunnan cu a cumpli largo tempo y tabata den legalidad”, Ruiz-Maduro a expresa durante conferencia di prensa regular par di dia atras.

Esaki a bin tras critica riba e proyecto FASE, cual tin como meta pa sostene trahadonan cu a perde trabou of a perde entrada te cu nan pago a baha bou 950 florin, pa un temporada di 3 luna. Critica a cay, bisando cu FASE no ta bon hinca den otro, pa via cu a sali afo cu e ayudo no lo ta aplicabel pa tur e personanan cu a aplica. Sinembargo, Ruiz-Maduro a desmenti esaki pasobra a haci un analisis unda a bin afo dicon cierto grupo di persona no a bin na remarke. “Cu e tipo di cosnan aki mi ta kere ta miho nos no core saca conclusion”, e mandatario a expresa.

Tabatin un grupo substancial di hende cu den nan aplicacion no por a mustra un payslip, tampoco un carta di trabou, of por lo menos un carta di trabou sin firma. Banda di esaki, tabatin hopi trahado cu no tabata inscribi den SVb of cu nan permiso a caduca. Ademas tabatin segun e mandatario un gran cantidad di persona cu a haya permiso di empleado domestico (inwonende dienstbode) den gobernacion anterior cu a subi mercado laboral en bes di haci trabou na cas. “Esaki merece un investigacion”, Ruiz-Maduro a bisa. Tur esaki claramente ta cay bou e capa di empleo ‘zwart’. “Como pais nos tin cu bay trata tambe cu e ilegalidad aki pa asina mira e aspecto di compliance di esunnan cu a maluza di e sistema”, Ruiz-Maduro a bisa.

No ta solamente trahamento ‘zwart’

Maske a bin na cla cu tin un fenomeno di empleo ‘zwart’ na Aruba, tabatin grupo di persona cu a aplica cu no a bin na remarke, pero cu no a bin na remarke pa otro rason cu no ta ilegalidad. Entre nan, Ruiz-Maduro a indica cu tabatin un grupo di persona cu a perde trabou prome cu e COVID-19 a presenta na Aruba, cual kiermen cu nan no por haya FASE. E personanan aki claramente por pidi otro tipo di yudansa, manera bijstand, cerca Departamento di Asuntonan Social (DAS). Bou e grupo aki tambe a haya pensionadonan cu a aplica, cual ya caba tin entrada via nan pensioen y esey ta haci cu nan no ta bin na remarca.

Ruiz-Maduro a sigui detaya cu tabatin un grupo di persona cu no tabatin cuenta di banco, of a yena un cuenta di banco di otro persona, cual ta otro cos cu ta stroba e proceso di por otorga e ayudo di FASE.