No tin ultimatum di sindicato riba pone Aruba plat; Gobierno dispuesto pa sigui delibera cu sindicatonan, pero decision mester cay

Meymey di e crisis actual cu nos ta pasando aden debi na e coronavirus/Covid-19, ainda gobierno y gremio sindical no a yega na un bon entendimento relaciona cu e cortamento di salario y cierto otro beneficionan den sector publico.

E discusion y discrepancia entre ken mester entrega mas of menos ta mustra uno sin final. Sinembargo comunidad ta spera cu sano huicio por persevera cerca e lidernan sindical y nan miembronan pa no pone Aruba plat, net na momento cu nos ta pasando den un situacion hopi dificil.

El a declara cu niun momento su persona a tende tocante ponemento di Aruba plat. Sinembargo e si ta na altura di algun voice note cu ta circula rond cu cierto insinuacion. Pero el a bisa cu no tabata ta cos real, sino cu tur ta falso.

Prome Minister Evelyn Wever-Croes a informa cu den e reunionnan cu nan a yega di sostene cu sindicatonan no a wordo expresa cualkier tipo di accion. A pesar cu ainda nan no a yega den un bon entendimento, el a sigura cu nan ta sigui den combersacion y gobierno lo sigui sinta na mesa di deliberacion cu sindicatonan.

El a referi na e carta di diaranson ultimo, caminda gobierno ta haya cu e gremio sindical a bin cu hopi condicion riba mesa. El a bisa cu e ta tuma cada un di e condicionnan aki hopi na serio, ‘sino nan no lo poni ariba mesa.’

Sinembargo pa atende cada un di e condicionnan aki, e mandatario kier tuma su tempo pa e por elabora riba nan. Kiermen investiga nan ponencia y evalua si nan ta cosnan cu e por atende cune si of no. Pero manera el a yega di declara, algun di e problemanan cu sindicatonan a yega di trece dilanti, nan ta cosnan cu tin añanan cu ta bayendo asina.

“Ami tambe lo kier cambia e mundo den un dia,” el a bisa.

Igualmente e no ta di acuerdo por ehempel cu cierto director di cierto compania cu ta gana cuater of cinco biaha mas hopi di loke e mes como prome mandatario ta gana. Considerando cu e ta carga mas responsabilidad cu nan.

E ta haya cu naturalmente esey no ta algo cu bo kier den bo comunidad. Pero e ta kere cu e situacion aki ta canando for di 34 aña pasa. Pero e no ta haya cu awor cu nos ta ‘lomba contra muraya’ no ta e momento pa bin cu e tipo di menasa aki.

Finalmente e ta kere cu cada sindicato mester carga nan responsabilidad, y nan como gobierno tambe ta carga esun di nan mes. Nan lo tuma un decision final riba e discrepancia cu ta existi entre ken ta entrega menos of mas.