Parlamentario Shailiny Tromp-Lee ta subraya e importancia di un plan di recuperacion pa turismo y nos economia.

Aruba completo  ta consciente cu e crisis ocasiona pa Covid-19 ta devastador pa nos economia y turismo. 

Manera debidamente indica pa Minister di Turismo sr. Dangui Oduber no obstante e situacion dificil aki ta di sumo importancia pa cuminsa prepara pa pone Aruba bek riba pia. Según Tromp-Lee pregunta ta kico mester haci y na ki manera. Tromp-Lee ta indica cu e proceso aki a bin ta tuma luga ultimo tempo banda di e proceso di maneha COVID-19 riba su mes.

Gobierno a indica cu nan no sa ki dia exactamente lo dicidi pa habri frontera bek pa turista y tampoco no sa precies ki dia lo kita shelter in place y toke de queda pa nos economia por cuminsa draai. Pero Gobierno a informa tambe cu como cu turismo ta e pilar di nos economia, ministerio di turismo hunto cu A.T.A. a bin ta traha riba un plan di recuperacion, conhuntamente cu AAA, AHATA y ATSA. Algo cu según Tromp-Lee ta hopi importante.

Hunto nan a desaroya un Plan di Mercadeo pa Recuperacion di nos Turismo. Segun Gobierno e plan aki ta presenta diferente oportunidad cu ta mustra varios scenario. E plan ta trata tambe loke nos por logra hunto y riba kico nos lo bay enfoca asina cu Aruba lo habri su frontera bek y cu nos ta cla pa yama nos bishitantenan bon bini.

E momento t’ey y ta crucial pa nos  reconstrui nos producto turistico teniendo cuenta cu entre otro e estudio di capacidad di carga, accionnan pa proteha nos naturalesa y nos patrimonionan cultural. Tromp-Lee ta bisa pakico laga e oportunidad unico cu e crisis aki a crea bay perdi y ta spera cu pronto e por haya un bista di e plan aki y ta trece padilanti cu e tambe lo desea di aporta na e reconstruccion di e industria tan importante cu ta nos turismo.

Mescos cu Gobierno, Tromp-Lee tambe ta convenci cu pronto nos lo cuminsa start e proceso di recuperacion y cu turismo lo cuminsa mustra su forsa  bek. Segun Tromp-Lee e ingrediente esencial y primordial t’ey, nos hendenan. Ta nos cordialidad y calidad di servicio ta loke a haci nos turismo grandi.

Tromp-Lee a termina bisando cu Gobierno ta trahando riba diferente plannan di recuperacion y cu den e dianan nos dilanti pueblo lo haya sa mas kendenan ta trahando riba nan y pa ki tempo nan lo ta cla