Secretario di Estado Raymond Knops a informa cu Conseho di Minister di Reino a aproba ayudo humanitario pa Aruba, Corsou y Sint Maarten.
Ta trata aki di 16,5 miyon euro, cu ta ekivalente na 33 miyon florin.
E ayudo humanitario aki ta pa tur 3 isla, Aruba, Corsou y Sint Maarten, pa 3 luna y ta pa prepara pakete di cuminda y materialnan di higiena pa esnan mas vulnerable den nos comunidad. E ministerio di relacion di Reino ya ta den contacto cu CEDE Aruba pa por yuda esnan den necesidad.
E suma total lo wordo reparti segun e necesidad di cada isla.
Gobierno di Aruba ta aprecia e gesto aki, cu ta demostra solidaridad den Reino.
Durante e conferencia di prensa, Secretario di Estado Knops a elogia Gobierno di Aruba cu a tuma e prome pasonan pa reduci gastonan den cuadro di solidaridad, segun un comunicado di prensa.
Gobierno di Aruba awor mester entrega e peticion pa ayudo financiero pa por duna subsidio di salario y e FASE pa trahadonan di sector priva. Manera ta conoci, no tin consenso ainda bou tur sindicato y esaki por retrasa e proceso. Gobierno di Aruba ta spera di por finalisa e proceso aki tambe pronto.
