Editor di un corant a bringa bek contra e dukesa di Sussex na un audiencia den corte ayera, rechasando acusacionnan cu deliberadamente a crea un disputa entre Meghan y su tata, y pidiendo pa elimina e acusacion for di su demanda contra e compania.
E audiencia preliminar na High Courte Britanico tabata e prome etapa di accion legal di Meghan contra Mail on Sunday y su compania mama, Associated Newspaper, pa publica locual Meghan ta describi como un carta ‘priva y confidencial’ na su tata na augustus 2018.
Porcionnan di e carta cu el a skirbi a aparece den e corant y online seis luna despues. Demanda civil di Meghan ta acusa Associated Newspaper di violacion di derecho di autor, mal uso di informacion priva, y violacion di e ley di proteccion di data Britanico.
E compania ta nenga di a actua contra ley, y su abogadonan a argumenta cu e acusacionnan specifico di ‘deshonestidad y intencion malicioso’ no mester ta parti di e caso.
Meghan y su casa, prins Harry tabata spera di scucha parti di e audiencia argumenta pa nan abogadonan. Abogado di e dukesa, David Sherborne a bisa durante e audiciencia ayera cu e editor ‘a revela na henter mundo e contenido detaya di un carta priva di un yiu na su tata’.
Sherborne a bisa cu Associated Newspapers a ‘acosa’ tata di Meghan, Thomas Markle, a manipul’e pa duna nan entrevista y a tuma otro accion cu proposito di ‘provoca’ un disputa entre Markle y su yiu muhe famoso.
Un abogado representando e compania editor, Anthony White, a bisa den documentonan di corte cu e demanda di Meghan ta acusa di conduca ‘seriamente inapropia’ y delibera ‘cu efecto cu e motibo di e acusado tabata pa busca di fabrica of provoca un disputa familiar cu proposito di tin un bon storia of storianan pa publica’.
White a pidi hues pa rechasa e acusacion prome cu un huicio completo den e caso, argumentando cu e motivacion di e editor tabata ‘irelevante na e acusacion di mal uso di informacion priva’. E abogado tambe a rechasa e acusacion di Meghan cu e editor a ‘actua deshonestamente’ na momento cu a dicidi ki parti di su carta pa publica.
E mal relacion di Thomas Markle cu su yiu muhe a complica entrada di Meghan den famia real Britanico. E tabata programa pa cana Meghan na altar durante su boda cu Harry na 2018, pero a retira na ultimo momento, citando problema cu su curason. E ex-director di luz di television ocasionalmente a duna entrevista na medionan di comunicacion, kehando na december 2018 cu el a wordo ‘ghosted’ (ignora) pa su yiu muhe despues di e boda. E carta cu Meghan a skirbi tabata tres luna despues di e boda real na Windsor Castle.
Analistanan a compara e caso legal na un demanda di mama di Harry, e fayecido prinses Diana, tocante potret cu a mustr’e haciendo ehercicio na gym. A resolve e caso prome cu un audiencia den corte.
Harry pa largo tin un relacion dificil cu prensa. Ora e y Meghan a anuncia accion legal tocante e carta, el a acusa algun corant di conduci un ‘campaña despiadado’ contra su esposa y a compar’e na e trato di prensa cu su mama, ken a fayece den un accidente di auto na Paris na 1997 persigui pa paparazzi.
Anteriormente e siman aki, e pareha a publica un carta fuerte cu nan a manda na varios tabloide Britanico declarando cu nan no lo sigui coopera cu e publicacionnan pa motibo di locual nan a yama storianan ‘distorciona, falso of invasivo’.
Nan a skirbi den e carta cu nan no ta dispuesto pa ‘ofrece nan mes como placa pa un economia di click bait y distorcion’.
Na januari, Harry y Meghan a anuncia cu nan tabata renunciando como miembronan senior di realeza, buscando independencia financiero y mudando na Merca. Nan plan a bira oficial na fin di maart.
