Gobierno Mericano a ordena e empresa petrolero Chevron “termina gradualmente” su operacion na Venezuela. A prohibi e compania perfora o exporta crudo y a exigi cu e ta reduci su actividad na e pais na un simple “mantenimento” di su activonan pa evita cu e productonan di petroleo por yega na e regimen di Nicolas Maduro.
“Nos a emiti un licencia nobo cu ta prohibi cu e productonan di petroleo di Chevron o di cualkier otr compania Mericano por yega na e regimen di Maduro,” un funcionario cu a pidi anonimato, den un rueda di prensa telefonico cu un grupo chikito di medio.
Na mesun momento gobierno Mericano a extende diamars pasa, te proximo 1 di december e autorisacion na cinco compania den sector petrolero, entre nan Chevron, pa opera na Venezuela, a pesar di e sancionnan contra Pdvsa.
Departamento di Tesoro Mericano a informa den un comunicado di e decision ey, cu ta afecta e companianan, aparte di Chevron, Halliburton, Schlumberger, Baker Hughes y Weatherford International.
Esaki ta di cinco biaha cu gobierno Mericano ta emiti un autorisacion na e empresanan aki. E extension di e licencianan te fin di aña ta coincidi cu e caida di e prijsnan di crudo, cu a bolbe cay diamars pasa a base di e demanda abao den e incertidumbre di un reapertura economico den e actual pandemia di Covid-19. Tambe ta hunga un papel e problema di espacio di almacenamento di crudo, pa via di e benta abao, un situacion sin precedente, tambe na Venezuela.
