Durante un conferencia di prensa di Gobierno di Aruba, minister di Finanzas, Asunton Economico y Cultura Xiomara Maduro a relata loke ta trata un sosten financiero cu lo duna pa companianan chikito y mediano, pa motibo cu Aruba su economia ta consisti di un 90% di companianan aki.
Di esaki, Maduro a expresa cu pa tres siman caba ya nan a haci diferente reunion cu e sector di gremio comercial, pa asina por yega na e solucion pa brinda un alivio.
Aparte di e fondonan cu a logra coloca pa e programa FASE, Maduro a expresa cu tambe a logra pone un fondo di 40 miyon florin pa 3,600 compania chikito y mediano cu tin menos di 50 trahado. Nan lo ricibi 4.000 florin pa kwartaal, e pago lo wordo haci via SVB y lo tuma luga otro siman na fin di luna di april.
Tocante esaki, Maduro a menciona cu nan a presenta un decreto ministerial na unda ta regarda di kico esaki ta trata y con nan ta bay aplica, pa cua personanan y pa ki tempo esaki ta bira disponibel.
Asina mes, e condicionnan pa cu esaki ta cu e companianan mester ta registra den Registro di Camara di Comercio riba 15 di maart 2020, cu excepcion si no ta un obligacion legal cu compania mester ta registra na Camara di Comercio; empleadonan mester ta registra na SVB riba 15 di maart 2020; tambe mester ta registra na DIMP riba e mesun fecha y tin number personal; e porcentahe di perdida di benta por lo menos mester ta di 25%; e compania mester ta estableci na Aruba y no na bancarota. Ta importante pa bisa cu e ayudo financiero aki di 4.000 florin no ta parti di e benta di e empresario.
Di otro banda, Maduro a trece dilanti cu nan a haya un oferta di Q’redits, un compania cu tin tres aña na Aruba brindando credito pa companianan chikito y mediano. Den e caso aki gobierno a ofrece un subsidio di 200.000 florin, cu ta un prestamo special pa asina por surpasa e situacion di COVID-19.
Cu e subsidio aki, Maduro a informa cu Q’redits por brinda 100 microcredito, di e cual 100 compania chikito y mediano ta bin na remarca, pa haya e ora ey un prestamo di 25.000 florin cu tin 6 luna liber di pago y un interes di 2% den 12 luna.
