Durante un conferencia di prensa di Gobierno di Aruba a wordo invita Dr. Maria Santi ken ta un psikiatra di Departamento Social y miembro di e Fact Team pa comparti informacion di loke ta sosode cu e salud mental di e mucha y adolescente pa loke ta trata e impacto di e cuarentena den tempo di coronavirus.

Awor cu henter pais ta den e crisis y hende mes ta mira e situacion aki como di miedo, no tur hende ta wak e oportunidad cu tin pa desaroya creatividad y comparti mas tempo den famia.

Den e proceso aki, Santi a splica cu no solamente ta sucede e proceso di cambio fisico, sino tambe riba medidanan cu mester tuma pa no bira malo ni contagia otronan cu e virus. Aki ta pone den wega e escala di balornan cu muchanan, adolescente y famia tin como herment.

Di esaki, el a menciona como ehemplo, responsabilidad. Salud ta un responsabilidad individual loke a bira un medida cu mester tuma pa no wordo contagia di e virus. Asina mes Santi a specifica cu no solamente ta den wega e salud fisico, sino e mental, pa motibo cu segun e madurez emocional cu e mucha lo por tin, asina bay ta e comportamento cu lo por presenta.

Kiermen, pa motibo cu esaki ta algo nobo, un cos cu tur hende tabata sa pero cu tampoco tabata pensa cu por yega na e isla. Muchanan a wordo informa cu mester keda cas, cu no lo bay scol, y esey ta ocasiona un impacto hopi fuerte den su salud mental, loke por causa miedo y stress.

Di loke ta trata muchanan mas chikito, esunnan bou 5 aña tin mas vinculo cu un persona adulto, pero esunnan cu ta un poco mas grandi tin mas interes pa e socialisacion cu nan amigonan, por ehemplo di su scol. Mesun situacion ta pasa cu hobennan den etapa di adolescencia.

Ta importante pa bisa, cu Santi a recomenda pa e mayornan mantene e calma, famia mester mantene e calma, pa motibo cu estado emocional di e muchanan ta depende den gran parti di e adultonan cu ta rond di dje. Si un famia ta brinda siguridad, ta duna paz, trankilidad y duna un splicacion di kico ta pasando segun e etapa di desaroyo di e mucha, mester splica cu nan no ta den temporada di vakantie, manera algun di nan ta pensa, Santi a manifesta.

Tambe tin cu informa cu nan tambe ta den cas pa por yuda, pa no contribui cu e plamamento di e virus. “Ta importante pa bisa e muchanan cu e unico tratamento cu ta sirbi pa combati e virus ta pa keda cas”, Santi a sigura.

Esaki tambe ta un oportunidad cu tur hende tin pa comparti den famia, pa haci algo hunto y establece un orario di bida cu ta costa hopi pa e muchanan. Un ora estableci pa e por lanta for di cama, pa come, pa hunga, pa haci su les, pa motibo cu bida ta sigui.

Tambe el a duna di conoce cu el a haya yamadanan di famia cu tin muchanan den edad di adolescencia, cu mayoria di nan ta laf den cas, cu nan no sa kico pa haci. “Aworaki e famianan mester restructura y hiba e bida cu nan mester tin como famia”, Santi a bisa.

Di mesun manera, Santi a trece dilanti cu tin caso di muchanan cu no tabata conoce su mayornan. Mayoria di nan tabata pasa nan tempo nan so den cas, sin comparti of sin tin un comunicacion berdadero cu nan mayornan. Pa e motibo aki tin desesperacion na momento cu a yega e ora di keda den cas uni.

Esaki ta un oportunidad pa traha den ekipo, pa cada ken cuminsa desaroya nan rol, sin gritamento y cu pasenshi, pa sinta cu e muchanan den edad adolescente puntra su inkietud, conoce nan amigonan di confiansa, haci actividadnan den famia como weganan of di relahacion.

“Tur mucha mester di un adulto pa por enfrenta e situacion aki” el a finalisa.