Centraaleindexamen a keda cancela: Schoolexamens y herkans mester bin cla entre 4 di mei y 4 di juni

A pesar di e crisis di e coronavirus/Covid-19, minister di Educacion, Ciencia y Desaroyo Sostenibel, Rudy Lampe su ministerio ta enfoca su interes pa no perhudica e studiantenan cu mester gradua y ricibi nan diploma e aña escolar (2019-2020).

Nan a manda tur directiva di scol loke ta bira e reglamento relaciona cu examen pa scol secundario, specialmente pa e candidatonan pa centraaleindexamen. E ta e examen cu ta bin for di Hulanda -e ta pone ekivalente entre calidad di nos enseñansa cu esun di nan- cu a keda cancela pa e situacion cu nos y mundo henter ta pasando aden debi na Covid-19.

Lampe a declara cu debi na e situacion aki bo, diploma final aworaki ta depende di e schoolexamens. Kiermen dependiendo di bo cifranan bo ta slaag si of no pa e aña escolar aki. Tur scol mester termina cu tur examen den un periodo di 4 di mei pa 4 di juni. Den e periodo ey –segun e mandatario- tur schoolexamens y herkans mester keda termina. Pa asina Aruba por keda den concordancia cu Hulanda riba e tereno aki. Ademas el a bisa cu aworaki su ministerio ta den contacto estrecho cu Hulanda tambe pa garantisa cu nan ta reconoce nos diploma, a pesar cu e centraaleindexamen no t’ey.

Igualmente el a bisa cu e aña aki na Hulanda e universidadnan ta mas flexibel pa loke ta e cifra di admision. E ta motiva tur candidato pa eindexamen pa nan continua cu tur tramite, si nan tin pensa di bay studia na Hulanda of otro pais.

Segun e mandatario e schoolexamens mester cumpli cu e reglanan di salubridad publico pa nan lo wordo realisa. Aunke e regla general cu Lampe a bisa ta pa schoolexamenstuma luga mas tanto digital. El a laga sa cu tin diferente manera tecnologico pa realisa schoolexamens digitalmente. Pero nan evaluando e dianan liber entre 28,29 y 30 di april pa scolnan realisa tur e trabao necesario di limpiesa pa prepara scol pa cumpli cu e normanan di higiena, sin den caso lo tin cu haci e schoolexamens di forma presencial. Logicamente manteniendo distanciamento social.

Di e forma aki for di 4 di mei si algun alumno y maestro lo mester bay scol pa atende cu e schoolexamens, esaki lo mester ta disponibel. El a bisa cu e protocol a wordo acorda cu SIMAR cu ta e sindicato di maestronan y tambe cu directiva di scol pa cumpli cu tur exigencia di salubridad publico.

Mas informacion ta disponibel via website di departamento di Enseñansa (www.ea.aw).