Dr. Sharline Vis di Fundacion pa Diabeticonan: ‘Ta importante pa pashent registra emocion y bisa kico nan ta sinti’

Durante un conferencia di prensa di Gobierno di Aruba, a presenta Fundacion pa Diabeticonan cu a ofrece un presentacion pa esunnan cu ta sufri di e malesa di diabetes, como tambe algun recomendacion pa por deal cu stress cu e situacion aki di COVID-19 por causa.

Dr. Sharline Vis a trece dilanti cu aworaki den tempo di COVID-19 a tuma hopi medida pa evita e plamamento di e virus, loke a influencia no solamente henter comunidad di Aruba, sino tambe e pashentnan cu ta sufri di e malesa aki.

El a splica cu na Aruba tin aproximadamente 8.500 pashent cu ta haya tratamento pa diabetes y ta importante pa stimula nan na e momentonan aki pa nan ta mas alerta cu nan condicion di salud.

Door cu a introduci e medidanan di shelter in place, esey a causa cu personanan mester keda cas, asina como algun di nan tin miedo pa sali riba caya y te hasta di bay dokter.

Asina mes, el a comenta cu tin pashentnan cu diabetes cu tin problemanan cu pia y cu mester bay dokter, pero door di e situacion aki, esey no a keda normal mas loke por causa algun complicacion.

Vis a menciona cu ta hopi importante pa pashentnan cu diabetes sigui usa nan medicamento manera a wordo prescribi pa nan rutina, bebe nan remedi di sucu pa e ora estableci, come na ora y incorpora algo di movecion pa regula nan nivel di sucu.

Vis a expresa cu ora un pashent cu diabetes ta incorpora movecion den su rutina, esey ta nifica cu e insulina di e curpa of insulina cu ta wordo inyecta lo ta miho usa y asina e regulacion di diabetes ta bira hopi miho.

Di mesun manera, el a laga sa cu tambe ta importante pa enfoca riba e estado di animo y cu diabetes ta un malesa hormonal. E insulina no ta traha bon den e curpa y no ta wordo usa bon, pero tambe tin otro hormona, por ehemplo adrenalina, cu ta esun cu e curpa ta saca ora tin un estado di stress of preocupacion, cu tambe por stroba e uso di insulina y asina por causa cu nivel di sucu lo subi.

Tempo di calamidad ta un cu ta duna stress y insiguridad. Vis como dokter di cas a ripara esaki tin hopi influencia riba estado di animo di e hendenan. Varios pashent a consulta den e dianan aki pa causa di stress. Asina mes el a duna un par di recomendacion con por deal cu esaki, pa motibo cu ora un persona ta haya stress, ta importante pa comparti esey y registra emocion, kico ta sinti y papia cu e famia of dokter.