Diaranson ultimo riba Dia Internacional di Paz, presidente di Colombia, sr. Juan Manuel Santos a entrega na Nacionnan Uni, e documento di e acuerdo di paz cu a wordo negosha entre su gobierno y guerrilla di Farc. Consul di Colombia na Aruba, sra. Mirza Gnecco a declara cu tur sede consular di Colombia den exterior a wordo informa cu dia 27 di september e acuerdo aki lo wordo firma formalmente na Cartagena.
“Ta evidente cu nos ta den un proceso nunca bisto den nos pais”, el a bisa. E echo historico aki –segun e diplomatico- ta duna mas importancia na e convocatorio cu a wordo haci pa tur ciudadano Colombiano pa nan expresa nan opinion riba e acuerdo aki dia 2 di october proximo. Un acuerdo di e caliber aki tambe tin su impacto den nos region, ya cu ta trece mas stabilidad cun’e.
Entrante otro siman nan lo cuminsa cu un proceso pedagogia tocante e contenido di e acuerdo aki cu a wordo firma na Cuba. E ta invita tur persona interesa pa haya informacion mas profundo riba e acuerdo aki. “Nos idea ta pa e hendenan cu lo bin vota por ta bon informa”, el a bisa. Nan ta suministra tur informacion obhetivamente pa nan por tuma un decision consciente pa medio di nan voto.
Faltando nuebe dia so pa celebra e referendum aki den e sede consular di Colombia na Aruba, e diplomatico Mirza Gnecco a bisa cu nan ta esunnan encarga directamente cu e logistica di e proceso aki cu ta bayendo riba bon caminda. 3.024 Colombiano residencia na Aruba lo tin oportunidad di aproba of desaproba e acuerdo aki pa medio di nan voto. Esun cu kier check si nan ta riba e lista of censo pa vota den e referendum aki nan por consulta e website: www.registraduria.gob.co
El a bisa cu e actividad aki lo tuma luga parti pafo di e consulado di Colombia, caminda nan lo instala tentnan pa asina protege tur hende di e temperatura halto cu ta asota nos isla. Ya caba nan a ricibi tur e material cu lo wordo uza den e referendum aki. Nan a haya caba tur instruccion y nan lo instala shete mesa di votacion, caminda e huradonan a keda nombra caba.
