Parlamentario Dellanire Maduro(POR): ‘Meta ta pa sector publico y priva por sostene otro den e creacion di un vision y plan di accion’

Lider di Fraccion di POR den Parlamento, Dellanire Maduro durante reunion tocante Covid-19 a presenta punto di bista di su fraccion y partido riba e pakico nan ta considera importante pa bin cu un ‘lock down’ total pa minimo di 14 dia. E ta indica cu locual tin cu tene cuenta cune ta cu mas dia nos keda den toke de queda y shelter in place, wardando pa e dia cu nos lo bay den un ‘total shutdown’, mas largo ta haci e proceso. Ademas, tur e problemanan social y desempleo lo ta mas grandi ainda. Maduro ta bisa cu un ‘lock down’ total a largo plaso lo ta costo efectivo.

Un otro punto cu el a elabora riba dje den cuadro di e crisis cu Corona Virus a trece cune ta, cu pa por contribui cu gobierno pa finalisa mas pronto posibel e ‘plan nacional di recuperacion economico’, partido POR a reuni di forma virtual cu mas di 40 stakeholders. “Meta ta pa sector publico y priva por sostene otro den e creacion di un vision y plan di accion cu lo conduci na un mayor continuacion di nos economia mas pronto posibel”, Dellanire Maduro a indica.

Despues di esaki el a presenta un serie di pregunta na diferente minister pa por haya mas claridad riba e situacion di Covid-19 na nos isla.

1.Tin un plataforma consiso unda cu sector priva tambe ta participa activamente den decision di gobierno pa cu e plan nacional di recuperacion economico? Si hobennan/young entrepreneurs tambe ta forma parti di esaki? 2. A menciona cu origen di e infeccion di 26 caso no ta conoci, ki dia tabata e prome caso positivo di transmision local? 3. Si a inicia dialogo cu laboratorionan acredita pa locual ta Rapid test IgM/IgG y si lo apoya nan pa valida e test aki? 4. Durante tratamento di presupuesto di Pais Aruba a haci minister e sugerencia pa bin cu test via drive thru mirando cu e ta duna mas siguridad na e dunado di cuido y e persona cu ta bay test. Minister a bisa cu ta bezig cu esaki, con leu e proceso aki ta? 5. Por duna splicacion /comparti por escrito con a yega na e calculacion cu 13 di mei nos lo yega nos piek?

6. Por comparti cu Parlamento di Aruba, e epidemiologische overzicht (cu no ta papia di caso individual) y mapa di geo-location?

7. Cuanto persona 60+ nos tin actualmente cu ta biba nan so na Aruba? Si presenta un persona di edad cu ta biba su so con y ken ta percura pa e necesidadnan di e persona aki? 8. MR (ministeriele regeling)NO 48 na pagina 15 tin diferente regla treci dilanti pa locual ta supermercado/minimarket. Durante un Shutdown por duna espacio pa ‘taskforce’ por evalua cua di minimarket, supermarket ta cumpli cu reglanan presenta, pa asina garantisa e siguridad, reduccion di posibel contagio mas hopi posibel na empleado y cliente, specialmente cu nos no sa si nos lo haya un ‘tweede wave’ y asina duna espacio pa prepara? 9. No por lubida riba tur e otro enfermedadnan, entre otro diabetes y hipertension. Debi cu mayoria di e capacidad di cuido di pais Aruba ta concentra riba COVID-19, kico gobierno su plan/strategia ta pa atende cu e “wave” di cuido cu mester wordo duna y no ta tumando luga, es decir, cuido cu ta acumulando?

Dellanire Maduro a sugeri gobierno tambe pa durante conferencia di prensa di gobierno pa percura pa cada topico cu ta presenta na comunidad, wordo presenta y realisa door di persona cu tin e conocemento pa haci esaki. E ta considera cu comunicacion ta esencial pa trece trankilidad y claridad riba e maneho cu pais Aruba ta ehecutando.

Finalisando, lider di Fraccion di POR a indica cu diamars tabata dia internacional di salud, cual a wordo dedica na enfermeronan y parteranan. “Mi kier a duna nan danki pa a scoge e carera aki, un carera vital, no facil y cu hopi sacrificio. Nan tin un rol indispensabel den area di salud, sin nan e sistema di salubridad publico no por funciona. Como medico general mi persona kier duna danki na mi coleganan mediconan aki na Aruba cu ta haciendo nan maximo esfuerso pa brinda cuido a pesar di reto y riesgo cu esaki ta bin cune”.

Tambe el a manda un mensahe na comunidad di Aruba, “hunto so nos ta logra sali di e crisis aki. E crisis aki ta brinda nos e oportunidad pa adapta, pa ta innovativo, pa ta creativo pa nos por diversifica nos economia. Hunto nos por”.