Harry y Meghan ta bisa cu no lo coopera cu tabloidenan Britanico

Duke y dukesa di Sussex a anuncia cu nan no lo sigui coopera cu varios tabloide Britanico pa motibo di locual nan ta yama storianan ‘distorsiona, falso of invasivo’.

Prins Harry y Meghan a bisa editornan di The Sun, Daily Mail, Daily Express y Daily Mirror den un carta cu nan no lo ‘ofrece nan mes como placa den un economia di ‘click bait’ y distorsion’. Representante di e pareha a revela un copia di e carta dialuna.

Harry y Meghan a skirbi cu storianan anterior cu e tabloidenan a publica basa riba ‘chisme’ a daña bida di nan conocirnan y desconocinan. Nan a bisa cu lo tin ‘cero participacion’ cu e publicacionnan bayendo dilanti, pero ta ‘kere cu un prensa liber ta clave di cualkier democracia’.

Harry, kende ta nieto di Reina Elizabeth II y di seis den linea pa trono Britanico, a casa cu actriz Mericano, Meghan Markle na Windsor Castle na mei 2018. E ceremonia televisa a ser mira rond mundo. E pareha despues a bisa cu nan a haya e scrutinio cu nan a ricibi di medionan Britanico como acoso y intolerabel.

Nan decision pa rechasa e tabloidenan a bin despues cu documentonan den corte a revela con Meghan y Harry a suplica tata di Meghan, Thomas Markle, pa stop di papia cu prensa den dianan prome cu nan boda. E par a adverti cu papia cu medionan lo tin consecuencia negativo y a purba di yud’e, segun mensahenan di texto adhunto na e demanda di Meghan contra editor di Daily Mail, Associated Newspapers.

E ta demandando pa invasion di privacidad tocante un articulo na 2018 cu ta inclui parti di un carta cu el a skirbi na su tata. Un audiencia den e caso ta programa diabierna na un corte na London. Associated Newspapers ta rechasa e acusacion.

E documentonan den corte ta inclui mensahenan di texto den cual Harry a purba di alivia un berguensa familiar despues cu un storia di Mail on Sunday a revela cu e futuro suegro di e prins a yuda saca potret di paparazzi di dje preparando pa e boda.

Harry pa largo tin un relacion incomodo cu medionan, cu e ta culpa pa morto di su mama, prinses Diana. El a fayece den un accidente di auto na Paris na 1997 mientras paparazzi tabata sigui e.