Sharline Koolman di departamento di Salubridad Publico (DVG), a informa cu pa cualkier pais di mundo Organisacion Mundial di Salud (WHO) a traha un linea di guia cu e pais mester cumpli pa bay na estilo di bida nobo pa atende cu Covid-19.

Pa cualkier gobierno cu kier lanta restriccionnan e pais mester cumpli cu 6 condicion basico cu -segun Koolman- ta cubri mayoria di e areanan cu tur pais tin como restriccion actualmente. Evaluando tur e puntonan di WHO, el a conclui cu tin puntonan cu ainda nos no ta cla cu nan.

Puntonan di WHO.
Un di e puntonan ta transmision di e virus mester ta bao control. Koolman ta di opinion cu nan mester wak nan datonan regularmente, y e prome punto nan ta evalua continuamente. A base di esey e dianan nos dilanti, DVG por duna mas conseho na esunnan cu ta tuma decisionnan riba ki direccion nos mester bay.

E di dos punto ta indica cu e sistema di siguridad mester por detecta, test, isola y trata tur caso y busca tur contacto. DVG ta di opinion cu nan tin esaki bao control.

E di tres punto ta referi cu e riesgonan mester wordo minimalisa den luganan mas vulnerabel, manera casnan pa anciano. El a bisa cu e casnan di cuido tin nan protocol na nan luga caba. Ademas nan a cera nan luga caminda no por bishita hende grandi. E ta haya cu e punto aki ta basta bon bao di control tambe.

E di cuater punto ta referi na scolnan, luganan di trabao y otro instancianan crucial a establece medidanan preventivo. Ainda DVG ta bezig cu e punto aki, y Koolman ta kere cu nan no tin’e full domina ainda. Por ehempel e parti di scol, e ta haya cu mester wordo poni mas cla posibel riba papel, y riba esey nan ta trahando riba dje caba. Tambe pa loke ta empresanan esencial pero e funcionnan esencial cu e empresanan aki por tin. Nan ta di opinion cu ora cu e esaki ta na su luga nan por bisa cu nan tin e punto aki domina. Pero esey no ta e situacion aworaki ainda.

E punto cinco meter por maneha e riesgo di importacion di casonan nobo. Mirando e situacion mundial relaciona cu e situacion di Covid-19, y specialmente di Merca, nos por ripara cu esaki no ta e caso actualmente. Na Europa y particularmente Hulanda tin su casonan y nan ta purba di domina nan y control’e mas miho.

E punto cinco no tin di haci cu Aruba su situacion, pero Merca ta nos principal mercado turistico y e ta un destino cu nos hendenan ta custumbra di bishita. Igualmente e punto 5 aki ta depende si tin tur e puntonan anterior bao control.

E punto 6 ta referi cu comunidad mester ta completamente educa, comprometi y capacita pa biba bao di un norma nobo. Koolman ta considera e ultimo punto aki hopi importante y pa e motibo aki gobierno te cu aworaki ta duna informacion dos biaha pa dia pa por cumpli cu loke e punto aki ta stipula lo miho posibel.

El a indica cu e punto aki no ta depende di gobierno sino di comunidad. Pero e ta haya cu comercio tambe por duna un balor agrega riba e parti aki. Kiermen gobierno por yuda maneh’e pero e no mester depende exclusivamente di gobierno, sino di comunidad henter.

Unda nos ta aworaki?
Koolman di DVG a bisa cu nan a presenta e puntonan aki pa comunidad por comprende cu e idea no ta keda pega unda nos ta aworaki. “Nos mester wak nos dilanti y unda nos kier bay,” el a bisa. E ta haya cu e cambio solamente lo por sosode si nos por cumpli minimalmente cu e 6 puntonan aki.

E puntonan aki por duna nos un guia, specialmente ora cu nan mester duna conseho na esnan cu finalmente mester tuma e decision final, pa kita cierto medidanan, si nos ta cla si of no. Den su conclusion el a señala cu por ehempel pa punto 4 y 6, ainda pais Aruba no ta cla.

Ya anteriormente, dia 13 di april, Bon Dia Aruba a yega di formula e pregunta si ta wordo spera un di dos peak epidemiologico di Covid-19. Koolman a yega di contesta cu ainda nos no sa si a pasa un prome peak ainda. Nan tin prome cu sigui monitor e comportacion di e virus na Aruba pa asina tin un bista riba futuro.

El a agrega cu hopi cos ta depende di con nos situacion ta paden y si nos tin nan bon controla. Tambe ki medida nan ta bay kita regularmente y tambe nan mester mira di cerca e desaroyo di Merca ya cu e ta nos principal mercado turistico. Pero tambe hendenan local ta gusta bay Merca regularmente.