Presidente di Sindicato Aduanero di Aruba (SADA), Edward Maduro a dirigi un comunicado pa asina informa su miembronan riba e ultimo acontecimento. Muy specialmente riba gobierno di Aruba su yamado pa tur minister, parlamentario, pero tambe empleado publico lo mester bay entrega parti di nan salario debi na e situacion di crisis actual.
Ya caba, sindicalista Maduro como vocero di e bloke sindical di empleadonan publico cu ta agrupa seis organisacion sindical: SADA, SEPPA, SIMAR, SPA, FTA y TOPA a yega di reacciona riba e declaracion di gobierno. Nan a accentua cu na momento cu cualkier gobierno tin e intencion di mishi cu e posicion huridico di empleadonan publico, esaki mester ta a base di acuerdo cu e sindicatonan.
Diahuebs ultimo, Edward Maduro, e biaha aki bistiendo su pechi di presidente di SADA, a informa su miembronan cu nan no a haya niun tipo di acercamento oficial di parti di gobierno pa locual ta trata e ‘fase 3.” Den e fase aki, el a splica cu gobierno mester sinta cu e sindicatonan cu ta representa empleadonan publico.
Nan mester mas claridad ya cu nan a yega di tuma nota di algun informacion cu a bay riba social media y ‘vooral e parti unda cu ta menciona cu ‘ambtenaarnan mester entrega 40% di nan salario.” Tambe el a menciona den su comunicado cu nan a tuma nota cu minister di Husticia a desmenti esaki, mescos cu algun parlamentario cu a desmenti e tipo di informacion aki.
Maduro kier a trece un poco di trankilidad cerca e miembronan di SADA y coleganan di cuerpo di Aduana, unda el a sigura cu unabes cu SADA por haya informacion concreto y veridico pa locual ta trata e tema aki di ‘fase 3’ for di gobierno, nan lo wordo informa.
Igualmente Maduro -via e comunicado emiti pa SADA- a laga sa cu ya caba nos ta bibando un realidad nunca antes bisto cu tur e medidanan manera shelter in place, toque de queda y distanciamento social. Pues SADA ta haya cu e tipo di medidanan aki sigur “ta poniendo un presion enorme riba nos den tur sentido. Pues no ban pone extra presion riba nos mes, sin cu mester” a base di informacionnan no confirma.
E sindicalista Maduro na nomber di SADA a gradici su coleganan di Cuerpo di Aduana cu dia aden y dia afo ta laborando y hibando nos pais dilanti no obstante e crisis, pa asina percura cu tur trabao keda ehecuta manera debe ser. Tur dia containernan ta wordo controla, barco nan di container ta keda drenta y sin laga afo tur trabao administrativo necesario pa esaki nan tuma luga. SADA ta lamenta cu nan cuerpo no ta hayando reconocimento for di esnan prome yama pa haci esaki. Igualmente el a pidi pa nan cuida curpa y tambe di nan famia conforme tur e reglanan.
