Durante toque de queda: ‘Hende no por keda den cura di cas, esey ta nifica aglomeracion’

Diaranson ultimo, alto comisario di polis Vanessa Tjon Kock a trece dilanti un relato pa loke ta trata inkietud cu comunidad tin cu toque de queda. Asina tambe a manifesta cu loke a sosode diadomingo pasa na Village di San Nicolas ta un caso cu tin violacion di ley penal.

El a menciona cu na e momento cu toque de queda a cuminsa, nan a bin cu cierto medida. Ta existi cierto inkietud di comunidad pakico no ta permiti hende pa keda den cura durante e oranan di toque de queda, cu tin di haci cu aglomeracion.

El a señala cu nan a ripara cu ora un persona no tin e libertad pa ta riba caya cu auto, na e momentonan ey e persona kier e libertad na su cas, specialmente den cura di un ‘manera social’. Pero tur esey tin di haci cu aglomeracion y a base di esey ta haya prohibicion pa loke ta trata cura di cas, pafo di cas of riba caya.

“Cada biaha cu un medida ta wordo stipula, tambe ta wordo discuti den e crisis team”, Tjon Kock a expresa. Den esaki el a bisa cu varios departamento ta delibera e medidanan aki, mirando cu nan kier evita aglomeracion di hende.

Tocante loke a sosode dialuna atardi pa anochi na Village na San Nicolas, cu segun testigonan a bisa cu tabatin abuso di poder di parti di polis, Tjon Kock a comenta cu manera a keda conoci desde cu toque de queda a cuminsa cuerpo di polis tin cierto autoridad pa actua di un manera mas severo.

Den e caso aki, no ta solamente e parti di medidanan cu ta wordo stipula den decreto ministeria,l sino cu ta esunnan cu ta duna e base pa cuerpo policial por actua; y na e momento cu un ciudadano ta viola por ehemplo leynan penal, e ora ey automaticamente cuerpo policial tin cu actua tambe.

Pa loke ta trata abuso di poder, Tjon Kock a sigura cu semper tin e libertad pa cada persona cu ta sinti cu esey ta tumando luga acudi na departamentonan concerni di parti di cuerpo policial. Pa motibo cu tur caso ta haya atencion y na e momento cu un persona ta entrega un keho, un fiscal ta evalua e caso ey.

Den caso di Village, cuerpo policial ta investigando y ta atendiendo e caso. Sin lubida e hecho cu nan ta papiando di un caso di destruccion cu a tuma luga na Village, caminda cu tambe tin un keho entrega y cu tambe cierto leynan penal a wordo viola. A base di esey automaticamente un otro trayecto ta wordo cana.