Fundacion FADA Aruba ta tene na cuenta cu awo cu muchanan/hoben ta pasa nan tempo na cas, e aumento di video gaming, uso di television, Netflix, Youtube a bira grandi, tambe den adultonan.
Cindy Lacle, trahado preventivo di FADA, a splica cu for di aña pasa, Organisacion Mundial di Salud a bisa cu adiccion na video gaming ta un desorden grandi pa salud mental. Sinembargo, awo mas hende ta haci uso di video gaming na cas.
FADA ta bisa cu nan ta keda contra uso extensivo di video gaming, pasobra e por causa adiccion. Pero nan lo keda duna e hermentnan necesario pa siña mucha y adulto pa maneha esaki. Lacle ta bisa cu shelter in place ta un oportunidad pa muchanan comparti cu nan mayornan of pasa tempo cu nan.
E ta compronde cu tin diferente plataforma online. Muchanan ta bira mas adicto y ta dificil como mayor, pasobra e structura a cambia, ambos partido tin stress. Sinembargo, Lacle ta bisa cu ta importante como mayor pa keda implementa un rutina pa nan mes y e muchanan.
Por pone cierto ora pa e mucha por haci uso di su laptop y rednan social, despues haci huiswerk. Tambe si nan ta bezig ta comunica cu otro amigonan via rednan social pa mira kico nan ta haciendo. Pa mayornan keda crea un structura, sea traha programa caminda e mucha ta lanta, lesa, bay baña, haci cosnan na cas, organisa nan mes. “E ta bay pa structura”, haci actividad, e ora den momentonan liber por hunga video games y otro weganan.
Lacle ta bisa por pone lesnan di gimnasia pa haci conhuntamente den famia, den rutina di baile. Tambe mester tene cuenta cu distanciamento social, cu pa un mucha por ta straño, y nan kier uit nan mes cu nan amistad di scol. E ora ey nan por papia cu nan amigonan via video chat, pero cu supervision di e mayor.
“Di e forma aki, e hoben of mucha por uit nan mes, por papia di e miedo cu nan tin. No cer paden tur ora den cas tampoco. Pero den cura por core bais, haci wega manera scavenger hunt, unda nan por sconde y busca obheto. Tur esey pa distrae nan mes”, Lacle ta bisa.
Lacle ta comparti cu no ta solamente hende grandi ta sufri di stress, sino muchanan tambe. E ta keda un situacion dificil. “Nos tur ta bibando e crisis”, e ta afecta tur hende. Sinembargo no ta recomenda pa keda wak Netflix henter dia, pasobra ta pone e curpa bira floho, depresivo, no tin gana di haci nada. E ta enfatisa cu Netflix, YouTube y otro plataforma no ta malo semper cu tin supervision di mayor. Si tin wega pa edad 18+, mester ta consciente di kico e mucha ta bezig cune. Nan ta keda duna tips of idea riba nan rednan social, pa asina e mayor por tin un miho comunicacion cu su famia.
E ta bisa cu mester cambia e manera di pensa, haci movecion, ehercicio. Cambia e structura y traha un rutina nobo. Tambe e temponan aki ta un oportunidad pa mayornan por comunica cu nan famia, ‘nan yiunan, pa tende nan pensamento, nan problema, y uit nan mes’.
