Durante un conferencia di prensa awe den oranan di atardi, Gobierno di Aruba y DVG a trece un actualisacion di e cifranan di personanan afecta cu e virus COVID-19. Asina tambe e informacion di un persona di 79 aña cu a fayece pa via di e malesa aki.
DVG a informa cu e cantidad di pashent positivo ta 93, 39 persona a recupera, 53 persona tin e virus activo, negativo ta 1105. A test 1198 persona, 91 persona ta den cuarentena y 1 fayecido.
Aruba no ta un excepcion pa COVID-19. Diamars den oranan di mainta a keda conoci cu un persona cu tabata infecta cu e virus aki di 79 aña di edad a fayece. Minister presidente Evelyn Wever-Croes a manifesta cu investigacion lo ta tumando luga pa haya e causa di morto exacto.
Minister di Salud, Dangui Oduber a expresa cu e persona aki tabatin 15 dia den cuidado intensivo y segun e mes a expresa, ta parce cu e tabata sufri di otro malesa, pero e no a ofrece mas detaye di e caso.
