Skoa ta pidi pa inscribi mucha den aña escolar nobo lo mas pronto posibel

Anuesca Baly, director di Skoa a informa durante un entrevista pa Bon Dia Aruba cu inscripcion di scol pa aña 2020-2021 mester tuma luga lo mas pronto posibel. Tambe el a comenta cu esaki ta habri online. Tambe a remarca cu tur mayor cu te ainda no a inscribi nan yiu pa kleuter scol of eerste klas por haci esey ainda.

Pa esaki, el a menciona cu mester manda e documentonan di e alumno, cu ta trata carchi di AZV of seguro, na e momentonan aki di shelter in place e papel di 5 florin no mester ta actualisa asina cu por manda un copia di dje, su paspoort y acta di nacemento.

Baly a specifica cu ta hopi importante pa nan haya edad di e alumno. Muchanan di dos aña no ta pa inscribi na kleuter ainda, pa motibo cu mester tin 4 aña di edad.

Asina mes, el a señala cu tin mayornan cu te ainda no a inscribi nan yiu. Normalmente tin un grupo di mayor cu den temporada aki ya caba a inscribi nan yiu, mirando cu nan por a yega kantoor di Skoa pa esaki. Pero door di situacion di COVID-19, nan ta pidi pa mayornan pa inscribi nan yiunan via online lo mas pronto posibel.

Baly a enfatisa cu ta importante pa haci e proceso aki, pa motibo cu lo yega un momento cu nan no lo haya e scol di nan preferencia. E ora ey nan ta keda limita pa haya scol den nan area y tin cu inscribi nan yiu na otro scol di otro vecindario, locual mayoria di mayornan no ta gusta.

Ademas, Baly a expresa cu inscripcion lo keda habri pa motibo di e situacion cu henter mundo ta bibando aworaki cu COVID-19.

Mesun caso ta sosode cu alumnonan cu ya caba a studia den scolnan primeramente, cu ta den sistema di Skoa. Esey tambe ta habri pa mayornan por re-inscribi e alumno. El a enfatisa cu mayornan mester tene na cuenta cu si nan tin un cuenta di pago atrasa cu Skoa di aña escolar pasa, esey lo haci dificil pa re-inscribi e alumno. Den e caso aki nan tin cu tuma contacto via e-mail adres di Skoa.

“Mayornan mester tene paga caba nan cuenta, sino lo ta dificil pa inscribi e mucha atrobe”, Baly a manifesta.

Tambe el a bisa cu mayornan mester a haya un carta prome cu e situacion di COVID-19 cu a cuminsa y nan mester a cumpli cu su debe atrasa desde januari ultimo pa por re-inscribi e alumno. Tambe si kier bin na remarca pa haci un areglo di aña escolar nobo 2020-2021, lo tin cu manda un carta pa haci e peticion, esey no ta un problema, Baly a sigura.

Ademas di inscripcion pa aña escolar nobo, Baly a trece dilanti cu e aña aki, door cu nan a haya un exito cu Havo-kansklas aña pasa na La Salle College, nan ta bay haci esaki tambe na scol San Antonio e aña escolar di 2020-2021. Loke ta nifica cu tur mayor cu ya haci e escogencia pa e alumno por drenta den un Havo-kansklas, esaki den sentido cu si e studiante tin un Havo advies e por drenta tambe den Havo-kansklas na scol La Salle of scol San Antonio y e cuponan ta limita. Baly a resalta cu lo trata prome e peticionnan cu a entrega, pa motibo cu no lo habri hopi cupo pa e luga aki, lo mantene na dos scol.

Havo-kansklas ta trata di tur mucha cu tabatin un Havo advies y no por a drenta Colegio door cu nan no a pasa e tesis. Nan a habri esey na La Salle College, e oportunidad pa nan por drenta den un Havo-kansklas. Durante e aña escolar nan a usa e mesun buki cu otronan ta haya na Colegio Arubano y San Nicolas, e mesun materia pero cu e diferencia cu nan ta haci test. Door cu nan ta di Mavo, pa motibo cu e muchanan aki tin cu drenta na un scol manera Colegio Arubano of San Nicolas, na final di ciclo basico uno por drenta na ciclo basico dos sin cu e por tin algo atrasa.