Aruba a sigui e mesun paso di paisnan manera Merca y Colombia cu ta haci uzo hospitalario y clinico di e remedi Hidroxicloroquina, pa atende e pashentnan positivo di coronavirus of Covid-19.
Sharline Koolman di DVG dunado contesta na e pregunta lansa pa Bon Dia Aruba a confirma cu actualmente ta wordo haci uzo di Hidroxicloroquina pa atende e pashentnan cu Covid-19. “Si. E remedi aki tambe ta wordo uza na Aruba ora cu tin mester,” el a declara.
Hidroxicloroquina, un palabra un tiki dificil pa pronuncia, pero cu tabata den boca di presidente Donald Trump diferente biaha durante e ultimo dianan. E ta un medicina cu a wordo uza durante ultimo decadanan pa trata malaria (paludismo) y tambe ta wordo uza pa trata artritis severo y Lupus entre otro.
Aunke FDA (Food and Drugs Administration) a bisa na prome luga cu e tabata aproba solamente pa haci test pa aclaria si tabata efectivo of no, dia 29 di maart a wordo emiti un “autorisacion di uzo di emergencia” pa e medicina aki wordo uza den algun pashent cu coronavirus. Sin embargo e director ehecutivo di WHO Michael J. Ryan a bisa dialuna pasa cu a pesar cu tin diferente “cocktail” de medicina, WHO no a aproba ningun tratamento medico pa e Covid-19.
