Fitch Ratings a downgrade Aruba su status pa ‘Long-Term Foreign and Local Currency Issuer Default Ratings (IDR) di ‘BBB-‘ pa ‘BB’, cu Outlook negativo.
E agecia ta skirbi cu e downgrade ta refleha e caida fuerte economico anticipa na Aruba pa motibo di perdida di entrada procedente di turismo na 2020-2021 y e deterioro severo den cuentanan fiscal y externo como resultado. Fitch ta proyecta cu Aruba su corelacion Debe/GDP (debe gubernamental consolida) lo aumenta di 62.8% na 2019 te na 92.6% na 2020.
“Nos ta anticipa apoyo financiero den algun forma di Reino Hulandes di cual Aruba ta miembro cu un ‘status aparte’ pa asisti gobierno di Aruba cu su requerimentonan financiero extraordinario, pa facilita economia di e isla pa por absorbe un shock hopi grandi. E Outlook Negativo ta refleha e riesgonan considerable den direccion abao pa nos pronosticonan global y Aruba su industria turistico, di e pandemia global di coronavirus, como tambe e capacidad di autoridadnan pa decididamente corta e peso di debe, ora economia recupera cuminsando na 2021.
Autoridadnan di Aruba ta anticipa un caida di 80%den entrada di turismo despues di medida di lockdown mundial y e clausura di e aeropuerto nacional pa bishitante stranhero na maart. Turismo ta Aruba su sector economico principal, y Fitch ta calcula entrada for di turismo na 63% di GDP y 76% di actual entrada di exterior (current external receipts; CXR) na 2019, haciendo Aruba un di e teritorionan soberano mas dependiente di turismo. Fitch ta anticipa contraccion economico fuerte den e meradonan principal di Aruba: Merca (-3.3% real GDP), Canada (-3.6%), y paisnan di Eurozone (-4.2%) na 2020 y un recuperacion na 2021, aunke tin un ‘downside risk’.
Ta pronostica cu e ‘freeze’ turistico y Aruba su medidanan di cuarentena y lockdown lo causa un contraccion di 10% di GDP real di Aruba, lo aumenta desempleo dramaticamente y lo reduci actividad di negoshi chikito, y lo deteriora cuenta coriente te na un deficit di 15% di GDP, di un surplus chikito na 2019.
Cu esaki Aruba a cay den e categoria ‘BB’ cu ta considera speculativo of ‘junk’. Categoria ‘BBB’ ta esun mas abao cu ta considera ainda ‘investment grade’ den cual Aruba tabata varios aña caba, desde cu a perde e status ‘A’ cu nos tabatin anteriormente. Na 2011 Aruba tabatin un rating di ‘A’ di Standard & Poors. E downgrading aki, cu ta logico den e circunstancianan actual, lo ta bay tin consecuencia pa haya placa fia na un interes razonable.
