E miembronan nombra riba recomendacion di e islanan den e organismo Cft/CAft mediante un carta dirigi na presidente di e colegio di conseho financiero aki, prof. dr. Raymond Gradus, a distancia nan mes di e conseho cu na nomber di e organismo a bay pa Conseho di Ministro di Reino. Den e conseho a duna e pensamento di e demas miembronan, cu ta basicamente Gradus mes y e otro miembro, ex-ministro Hulandes Henk Kamp. E conseho tabata trata di e apoyo financiero pa mantene liquidez adecua na e islanan, despues di e catastrofe di coronavirus, cu a laga principalmente Aruba sin un gran parti di su divisa, cu ta drenta casi exclusivamente via turismo.

E miembronan inconforme, entre nan e miembro pa Aruba mr. Hellen van der Wal, ta bisa den nan carta cu nan respectivo comentarionan no a resona den e consehonan final y cu no a aplica ‘hoor en wederhoor’ den e proceso di yega na e conseho.

Por lo tanto e miembronan menciona ta desea di enfatisa cu:

  1. E consehonan insuficientemente ta refleha e sentimentonan di e miembronan di Caribe den e organismo;
  2. E miembronan di Caribe ta reconoce insuficientemente nan vision y posicion den e consehonan;
  3. Cu e consehonan no ta reconoce suficientemente e seriedad di e situacion den e paisnan den Caribe;
  4. E consehonan ta orienta demasiado unilateralmente riba e situacion financiero y no ta tene cuenta cu e consecuencianan social y economico (ta referi e.o. na e rapport di IMF encuanto e impacto economico di e pandemia pa Curaçao y Sint Maarten);
  5. E consehonan ta ignora totalmente e idea di solidaridad di Statuut di Reino Hulandes.

Cu e hecho di ignora e observacion y punto di vista di e sucritonan, nan ta opina cu no tin un conseho bon pensa y balansa na Conseho di Ministro di Reino, ni tampoco por papia di un conseho na nomber di e colegionan.

“Como miembronan local nos ta apoya e yamado di tur e organisacion y plataformanan manera IMF, OECD y Comision Europeo pa den e tempo di crisis aki ta solidario cu otro, como tambe e yamado pa e paisnan cu economia mas fuerte y cu reserva ta explicitamente solidario cu e economianan chikito y pober cu proporcionalmente ta haya golpi mas fuerte, y pa apoya nan ‘with no strings attached’.

E miembronan ta expresa e temor cu riba nan mes e islanan no ta bay logra, tambe pa motibo di e situacion den cual nan tabata prome cu e crisis di coronavirus. Nan ta di opinion cu si e apoyo Hulandes ta solamente den forma di prestamo, e corelacion debe/GDP lo surpasa grandemente e criterio di 40% pa ‘Small Island Developing States” (SIDS) cu IMF a establece y cu e actual crisis lo haci cu e paisnan ta bay mas ainda den e abismo.

Pesey e miembronan ta pidi gobierno di Reino pa considera duna un parti den forma di un donacion, cu por ta e parti cu ta surpasa e corelacion debe/GDP di 40%.