Investigadonan Brasileño a constata cu Atazanavir, un medicina usa pa tratamento di pashent cu HIV-sida, tin eficacia pa detene e reproduccion di SARS-Cov2, e virus cu ta provoca enfermedad di COVID-19, segun fuentenan cientifico a informa dialuna ultimo.
Estudionan di Fundacion Oswaldo Cruz (Fiocruz), e centro di investigacion medico mas grandi di Latino America y cu tin vinculo cu Ministerio di Salud di Brasil, a constata cu Atazanavir ta capaz di detene e multiplicacion di e virus y cu tambe ta reduci e proceso di inflamacion den e pulmon di e pashent cu ta contagia.
E medicina ‘a reduci e produccion di proteina cu tabatin vinculo cu e proceso di inflamacion den e pulmon y asina el a impedi e agravamiento di e cuadro clinico genera pa e enfermedad’ Fiocruz a informa den un comunicado.
E resultado di estudionan a ser publica dialuna ultimo, den e plataforma internacional di investigacionnan cientifico BiorXiv den forma di un investigacion preliminar, manera ta planea pa investigacionnan riba uso di medicina cu ta existi pa combati e actual emergencia sanitario, Fiocruz a splica.
“E analisis di farmaco aproba caba pa otro uso ta e strategia mas lihe cu ciencia por ofrece pa yuda pa combati COVID-19, hunto cu adopcion di protocol di distanciamento social implementa caba”, e specialista Thiago Moreno a afirma.
Segun Moreno, na e momentonan aki ta necesario pa busca alternativa pa trata COVID-19, enfermedad contra cual no ta existi vacuna ni tratamento comproba te awor, specialmente entre substancianan ya proba caba y cu un nivel superior di siguridad compara cu algun molecule cu a ser sugeri pa e mesun organisacion Mundial di Salud (OMS) pa estudionan.
