For di diferente corespondencia di ultimo simannan encuanto e situacion di crisis na Aruba y e otro islanan Hulandes den Caribe, por saca e conclusion cu lo bin ayudo den cierto forma di parti di Hulanda, den e situacion dificil como consecuencia di e pandemia di coronavirus, y mas cu tur cos e efectonan cu esaki tin riba economia di e islanan. Entre nan Aruba ta hayando e golpinan mas fuerte pa motibo di su dependencia di turismo.

Mientras cu di parti di e gobiernonan di e islanan, di Aruba en todo caso, ta spera cu parti di e placa necesario lo ta den forma di un donacion, den e corespondencia di CAft y e carta cu ministro Raymond Knops a manda pa parlamento Hulandes no por detecta ningun referencia na esaki. Ademas den expresionnan haci den prensa, Knops ya a indica cu e ayudo lo no ta den forma di donacion, sino den forma di prestamo so.

Esaki a causa un reaccion rabia di e fraccionnan den parlamento cu ta sostene gobierno di coalicion, den forma di un carta na Gobernador fecha dia 7 di april 2020, den cual e fraccionnan ta mustra indignacion pa e posicion cu e mandatario Hulandes a tuma.

Di nan banda e fraccionnan ta argumenta cu e articulo 36 di Statuut ta prescribi ayudo cu, segun nan interpretacion, no mester ta den forma di un prestamo, sino un donacion. Segun e fraccionnan loke a sucede awor, den e caso di e crisis di coronavirus, ta exactamente pakico a inclui e articulo aki den Statuut, cu nan ta mira como ‘derecho imperativo’ (dwingend recht) y cu por lo tanto Hulanda mester cumpli. E fraccionnan ta bay asina leu di bisa: “Ta pa nos como representante di pueblo incomprensible cu Hulanda ta trata di evadi su responsabilidad conforme articulo 36 di Statuut di Reino.”

Tambe e fraccionnan ta mustra cu e ausencia di un posible actuacion contundente pa loke ta procesa e peticion cu gobierno di Aruba a haci, ta negativo pa Aruba y ta trece stabilidad di e pais na peligro. Ademas cu nan ta mira cu un eventual decision desaprobante di Conseho di Ministro di Reino lo por tin consecuencia pa comunidad di Aruba.

E fraccionnan ta referi na e hecho cu Hulanda na hopi ocasion a yuda varios pais na mundo financieramente den tempo di crisis, manera den e caso di e problematica relaciona cu e situacion na Venezuela. Contrario na esaki, varios peticion di Aruba pa apoyo no por a conta cu un decision positivo di Hulanda. “Hulanda tin derecho di apoya financieramente paisnan fuera di Reino, pero pa cu paisnan dentro di Reino ta existi sin embargo un obligacion conforme Statuut.” Ta sumamente importante cu e relacionnan dentro di Reino ta bon, mas aun durante e crisis di Covid-19. Por lo tanto e suscritonan ta acerca bo persona, hustamente pa preveni escalacion di emocion entre e paisnan.”

Otro punto di debate fuerte lo por bira e recomendacion haci pa CAft den su prome conseho preliminar, pa pone en todo caso un raportahe mensual como condicion pa asistencia Hulandes den e proceso di recuperacion, manera ta existi caba pa Sint Maarten desde e desastre di horcan di algun aña atras. Na e momento aki Aruba ta raporta cada tres luna con implementacion di presupuesto ta bay, a base di e acuerdonan encera den e ley di Aruba (Laft) y e protocol di november 2018.

Nota di redaccion:

Na un momento cu nos pais ta den e cataclismo mas grandi imaginable, cu un perdida casi total di nos economia, lo ta mas na su lugar pa discuti cierto asunto via diplomacia discreto, cu tira e asunto riba caya. Aruba mester accion contundente; no tin lugar pa rabia ni frustracion. Pleito cu esun cu mester yuda no ta sirbi ningun proposito.