Ayera tardi, tanto minister di Salubridad Publico, Dangui Oduber, como departamento di Salubridad Publico (DVG) y Horacio Oduber Hospital (HOH) a expresa nan disculpa pa e incidente cu un pashent positivo pa coronavirus/Covid-19 a pasa aden diadomingo anochi.
E pashent, kende despues di a wordo trata na hospital, no tabatin transportacion pa hib’e su cas bek. Nan a desea e pashent un pronto recuperacion y tambe a wordo priminti cu un situacion asina no lo presenta mas.
E caso aki a wordo investiga y Dr. Daryanani di HOH a bisa cu inicialmente e mesun pashent no a pidi transportacion, ya cu nan a keda di busk’e na hospital. E ta haya cu e situacion aki a wordo presenta pa falta di un bon comunicacion entre e pashent su famia, y tambe cu hospital cu a causa cu a sali for di man.
El a papia riba e protocol relacion cu e transportacion di pashent, ya sea cu nan ta bin hospital cu ambulance of otro tipo di transportacion. El a bisa cu e pashent aki cu a wordo transporta pa hospital, y despues cu el a wordo trata den e sala di isolacion di e pashentnan positivo pa Covid-19 dor di dokter encarga y consulta dor di specialista na warda, a base di nan evaluacion nan a considera cu e pashent no mester keda interna den hospital.
Despues di esaki e pashent ta haya e opcion di keda den sala di isolacion wardando un hende bin busk’e of e por bay full pafo cu un mask, mirando cu e pashent ta positivo. E pashent a kies pa bay sinta pafo. “E pashent a bisa nos cu e ta regla transporte, asina Dr. Daryanani a declara.
Protocol.
Sinembargo despues hospital a cuminsa haya yamada di e pashent su famia reclamando cu nan a pon’e pafo. Mientras cu esaki no tabata un decision di hospital. Te hasta nan a wordo sorprendi di por a mira ainda e pashent afo, y nan por a check cu e tabata stabiel ainda. Eynan e pashent mes a bisa cu e tabata reglando algo, pero na e momento ey, e no por regla nada mas. Mirando e situacion aki nan mes a purba yud’e y nan mes a yama Cruz Cora, Ambulance y otro instancia, pero niun ‘caminda nos a haya hendenan pa bin busca e pashent,” el a bisa.
E ora ey hospital a dicidi di yama DVG cu a tuma e caso aki over. Mientras cu den e mesun momento e pashent a haya su propio transportacion y a yega cas ‘sano y salvo,’ asina Dr. Daryanani a declara ayera.
El a bisa cu den e protocol ta poni cu si un pashent ta cla pa bay cas, e por keda paden wardando pa su familiarnan bin busk’e. Of den caso cu e pashent no tin hende pa busk’e debi entre otro cu su famia ta den cuarentena, e ora ey mester tuma contract via telefon cu DVG. Nan tin manera con pa bin busca e pashent na hospital y hib’e cas.
