Serlimar Aruba: ‘Si hende no paga, no por paga e trahadonan’

Serlimar ta confrontando problema relaciona cu pago pa e servicio. Nan ta pidi pa esunnan cu mester haci nan pago, pa haci esaki pronto, pa asina por paga e trahadonan cu tin den nan departamento.

Anko Koopmans, director di Serlimar, a comparti cu for di dos siman pasa, e departamento ta confrontando un situacion fastioso. Esey ta pone cu a cuminsa tuma den consideracion e opcion di baha e cantidad di hende trahando na Serlimar.

Pa loke ta trata e luna di maart, ainda por paga salario pa mayoria di e trahadonan. Sinembargo, pa luna di april ta ‘mustra cu ta bay ta un caso dificil, pasobra nos ta den un situacion precario’. Segun Koopmans, e dia cu a cuminsa tene reunion cu minister, Raad van Toezicht, sindicato Seppa y STA, a bisa di e situacion di Serlimar y e problemanan cu tin pa sigura cu e compania ta conta cu e fondonan pa mantene tur empleado na trabou.

“E parti di terminacion di contrato ta un medida cu mester haci, pa motibo cu mester baha gasto. Pa bisa berdad y no ta pesimista, mester wak con ta haci pa futuro. Mi a cuminsa laat, y no tabatin chens pasobra mi a haya e situacion asina, y mester deal cune”, e ta expresa.

Koopmans ta bisa cu ta trahando duro pa asina por saca e cantidad di placa cu e departamento mester. A sinta hunto cu minister, pa pidi parlamento un presupuesto di 6.5 miyon florin. A bay di acuerdo pa esaki, pero ainda ta wardando pa ricibi e placa, ya cu te awo ‘no a ricibi nada’.

Sinembargo, kico lo pasa despues si no tin placa y Serlimar mester para? E ta bisa cu e compania ta uno esencial y importante pa Aruba, pasobra si sushi bira demasiado, ta crea un problema serio di higiena, cu por conduci na problemanan pio. E prioridad ta keda pa Serlimar sigui opera. “Si tin demasiado hende of no, mi ta kere cu cada compania tin cifra cora. E parti di personal ta e costo di mas grandi den presupuesto di un compania. Nos mester wak con pa sali di e situacion actual.”

Mirando e situacion, nan ta pidi pa hende cumpli cu pago. Koopmans a duna di conoce cu pa varios aña e cifra no a logra cumplimento di 50% na Aruba. Esey ta nifica cu hende no ta paga, pero ‘Serlimar si tin cu piki sushi’, mirando cu esaki ta hinca den ley.

Pa luna, e costo ta 25 florin. Si no cumpli cu pago, mester busca un deurwaarder, pero pa busca esaki ta costa mas caro pa e compania, pues ta keda sin resolve e problema di hende cu no ta paga. Koopmans a duna di conoce cu si tur hende cu tin un bak’i sushi lo paga Serlimar, e compania no lo ta den e situacion dificil cu ta actualmente.

E ta compronde cu e pandemia actual a haci e situacion mas fastioso, pero e ta pidi pa hende cu ainda tin e placa pa paga, pa cumpli cu e pago aki, pasobra esey ta e unico manera pa nan por tin suficiente placa pa paga nan empleadonan. “E ta bay den consenshi di hende pa asina yuda esunnan cu ta trahando pa no perde nan trabou.”

Pa nan, ta importante pa sigui cu servicio di tur dia, pa tene chauffeurnan di truck, esunnan cu ta traha cu truck, den servicio. E trahado paden, cu tin cu cuida nan salud pasobra nan bida tambe ta den peliger pa e pandemia di coronavirus, y toch nan ta cumpli cu nan trabou, segun Koopmans.

“Tur hende ta pasando den situacion dificil, pero ta spera cu por saca e 25 florin pa luna pa nos por logra. E situacion ta precario, y por bisa cu actualmente gobierno no a bin cu voorschot cu nos por bisa lo yega. Si ta asina, nos por pasa e luna di april. Pero ta haci suplica na tur hende, please haci nan pago pa yuda contribui na Serlimar. Si no, mester busca otro manera pa soluciona e problema di Serlimar”, el a remarca.