Durante un conferencia di prensa diasabra ultimo, prome minister presidente Evelyn Wever-Croes, Ministerio Publico y KPA a trece dilanti su preocupacion tocante e rijnan largo cu ultimamente un parti di e comunidad a cuminsa haci dilanti di diferente establecimentonan.
El a menciona cu ta ‘hopi desapunta’, pa motibo cu desde cu e crisis aki a cuminsa no a pasa un dia cu e ta purba di splica di un miho manera posibel, ‘cu nos por bringa cu esaki si nos ta keda paden’. Si un persona mester sali, e por haci esey y den un rato e mester bin bek na cas. Asina mes si e persona sali y wak un rij, e tin cu keda leu for di e rij ey, pa via cu eynan e por haya e contagio.
“E iresponsabilidad di esunnan cu ta core cu e riesgo aki a wordo atendi y e Task Force a cera 17 luga”, Wever-Croes a sigura.
Di mesun manera, el a manifesta cu si e situacion ta sigui asina no lo keda ni un supermercado habri y eynan lo haya un problema. Pero esaki no ta gobierno su responsabilidad, esaki ta e responsabilidad di e ciudadano cu no ta compronde cu e unico manera pa evita contagio ta keda paden.
Asina mes, Wever-Croes a menciona cu e 17 establecimento cu a cera diasabra ultimo tabata pa motibo cu nan a actua contra di e decreto ministerial ‘Shelter in place’. Sea establecimentonan no esencial cu no tin e precaucion di tene e hende leu for di otro, of no ta aplica e reglanan di higiena. Algun di nan prome minister a bisa cu nan a wordo reconsidera, pero cu autoridadnan ta trahando cu man duro den e caso aki.
Di su banda, fiscal di Ministerio Publico Yolanda Pronk a expresa pa cu esaki cu departamentonan, instancianan y companianan cu por wordo considera como esencial tin cu zorg entre otro pa distanciamento social. Tambe el a trece dilanti cu nan a dicidi di haci un cambio den e decreto ministerial pa esaki.
Desde diadomingo awor, den oranan di marduga lo drenta na vigor cu departamentonan, instancianan y companianan cu por wordo considera como esencial tin cu zorg tambe pa distanciamento social pa personanan cu ta para den rij pafo, den entrada of riba tereno di e establecimento. Si un di nan no ta cumpli cu esaki, e ora ey polis por cera e establecimento temporalmente, te cu por tin medidanan di siguridad bon regla.
Vanessa Tjon-Kock, alto comisario di KPA a señala cu e task force a yega e momento cu establecimentonan lo haya boet y lo keda cera temporalmente. “Esaki no ta pasobra polis a lanta contra pueblo, sino cu nos tin cu cuminsa conscientisa Aruba di un otro forma”, Tjon-Kock a contesta.
Ademas, el a informa cu e task force a haci 38 inspeccion, di cual manera a menciona 17 a wordo cera. Asina mes el a enfatisa cu lo sigui cu control, lo sigui dunando boet y lo keda cera luganan.
