Pa via di pandemia di coronavirus e cayanan di e centro historico y e beachnan di Cartagena de Indias ta desierto, igual na e cambernan di hotel, bar y restaurantnan, un situacion sin precedente den e ciudad Caribeño aki, meca di turismo Colombiano.
Na e beachnan, unda normalmente tin hopi turista y bendedonan, awe tin mas parha cu hende, mientras cu na centro historico y turistico e bario di Getsemani e silencio ta sepulcral, sin hende local ni turistanan, pa via di e cuarentena cu a drenta na vigor na final di luna di maart.
“E hotelnan ta paralisa.” Asina ta bisa e presidente ehecutivo di Asociacion Hotelero y Turistico di Colombia (Cotelco), Gustavo Toro.
E situacion di Cartagena ta igual na henter Colombia y e unico hospedahe cu ainda ta permanece habri ta esun cu ta aloha e hende cu a keda pega den e pais despues cu e cera e fronteranan na maart ultimo.
“Mi ta wak e situacion hopi compleho, awe nos tin un 5% di ocupacion den e promedio di e pais, practicamente hotelnan ta cera”, Toro a agrega.
Presidente Colombiano, Ivan Duque a duna orden pa e ceramento di tur frontera desde 17 di maart ultimo, y den seis dia a drenta na vigor e suspension pa 30 dia di entrada di biaheronan for di exterior.
E mandatario tambe a declara emergencia sanitario te dia 30 di mei, aunke Toro ta consciente cu ‘e pandemia no lo caba e dia ey’.
“E incognito grandi ta ki dia esaki lo bay pasa, nos sa cu e emergencia sanitario lo ta te 30 di mei, pero nos no sa si e dia ey automaticamente e problema lo caba, si nos a supera e dificultad aki”, el a sigura.
Toro sa cu e sector ‘lo tarda un aña pa recupera’ y cu ora lo haya un normalidad medio lo mantene un ‘restriccion di acercamento social, di aglomeracion, di reunionnan, mientras lo haya un salida of un vacuna’.
