Prome Minister, Evelyn Wever-Croes a anuncia cu entrante ayera nan a introduci un task force pa controla durante e shelter in place.
Gobierno a introduci un toque de queda den oranan di anochi, y den oranan di dia un estado di shelter in place pa evita cu mas hende por ta ariba caya y evita aglomeracion riba sitionan publico. Aunke e shelter in place ta mas flexibel compara cu e toque de queda, e personanan solamente mester sali pa loke ta strictamente necesario, ya sea pa paga un cuenta of cumpra cierto cosnan. Pero cada bes cu bo ta sali ta un riesgo pa bo mes, pero tambe pa bo famia di por haya e virus contagioso aki.
Sinembargo nan ta cuminsa mira cierto aglomeracion durante e shelter in place. P’esey gobierno a dicidi di bin tambe cu un task force pa atende cu e situacion aki. E ta un forma di purba evita e contagio di Covid-19 den comunidad. E task force lo atende cu e fila largo cu ta wordo presenta den cierto sitionan.
Prome mandatario a indica cu e ta un responsabilidad bilateral di un banda di e compania evita e fila largo dilanti nan negoshi. Pero e ta responsabilidad di cada ciudadano pa no bay caminda tin fila largo. Nan ta bay stop cu e fila largo aki pasobra e no ta contribuyendo cu e meta cu gobierno tin pa evita mas contagio di e Covid-19.
Pa esunnan cu mester paga servicio publico manera Elmar, Web y Setar, si nan ta haya un fila largo na momento di paga, e ta conseha nan pa bay bo cas trankilamente. Ya caba gobierno a anuncia cu no ta bay corta niun cuenta. “No tin un hancha pa core bay paga,” el a bisa. Otro dia cu tin menos hende riba e fila bo por bay paga.
El a bolbe urgi cada ciudadano di nos pais cu e coronavirus no ta discrimina. “E virus aki nan no ta bay bati na bo porta ora bo no t’ey. E virus aki ta para riba caya warda bo bin piki’e,” el a bisa.
