Ayera a tuma luga e prome radiotherapia na ImSan. E logro aki ta uno historico pa cuido medico.
Esaki ta nifica cu pashentnan residencia aki na Aruba no lo mester bay mas den exterior pa esaki. Esaki ta significa cu e pashentnan lo keda den su seno familiar. Na mes momento esaki lo reduci e costonan di AZV pa cu pashentnan cu ta wordo manda den exterior pa tratamento di radiologia.
Na januari Minister di Salubridad Dangui Oduber a indica durante su site visit na Imsan pa loke ta trata e prome fase di expansion di Imsan cu dentro di poco Aruba por conoce su prome afdeling di Radiotherapia funcional. Nos maneho di salud publico ta dirigi riba mehora e calidad di cuido y servicio. Cu e logra aki nos ta logrando mehoracion den cuido pa nos hendenan.
Minister Dangui Oduber den nomber di Gobierno kier felicita e visionario Dr.Joel Rajnherc y full team di ImSan Aruba y partners Di Miami Cancer Institute y Baptist Health. Awe ImSan a marca historia.
Imsan su vision y su desaroyonan pa cu cuido medico ta cuadra cu e vision di Gobierno di Aruba cu ta pa mehora e calidad di cuido na Aruba y como tambe crea un plan sostenibel pa Aruba pa asina e fondonan di AZV ta sostenibel pa den futuro. Mirando e crisis cu nos ta aden aworaki, sigur esaki ta caminda cu nos por reduci e gastonan di AZV. Tur esaki sigur ta cuadra cu vision di nos Gobierno.
