Presidente di FTA, Hubert Dirksz, como lider sindical a trece su reflexion riba e situacion di crisis cu nos pais ta pasando aden debi na e pandemia di e coronavirus/Covid-19. Apesar cu nan oficina ta cera, FTA su trabou no a para, el a bisa.
FTA ta trahando mas duro awor, mirando e situacion laboral cu a surgi, ora cu cantidad di trahadonan a wordo manda cas. El a declara na Bon Dia Aruba cu logicamente e procesonan di negociacion di contractonan colectivo (CAO) si a para. Pero nan contacto cu gobierno, gremio comercial si ta sigui. Y tambe nan atendiendo tur e keho di e trahadonan cu a aumenta grandemente.
Dirksz a expresa cu di parti di FTA nan ta contento cu gobierno por a scucha nan, ya cu loke ta pasando den henter mundo y Aruba, mester wordo atendi conhuntamente. “E ta un responsabilidad comun di cada un di nos pa aporta y sali for di e problema y evita cu e por bira pio,” el a bisa. Apesar di e impacto financiero economico hopi pisa pa Aruba cu e crisis, pero den todo caso FTA ta kere cu mester por tin salida.
E lider sindical a señala cu nan ta percura pa salvaguardia derecho di e trahadonan, specialmente FTA cu ta representa mayoria di e trahadonan cu ta traha den e sector Horeca. Pero tambe el a trece su mensahe riba e parti di responsabilidad ciudadano cu cada un di nos mester tin actualmente. E situacion aki por tin consecuencia grave pa cada un di nos. Y esaki ta exigi di cada un di nos pa uza nos sabiduria, profesionalismo, comprension y respet pa otro. E ta e unico manera cu nos por sali pa dilanti.
Importante ta -segun presidente di FTA- pa ‘cada un di nos mester evita lo pio pa esnan di mas necesidad.’ Pero tambe cu nos por sali bek, y bin bek tanto pa loke ta empleo, pa asina cada famia por tin un bida normal bek despues di e crisis aki. Pero considerando cu e impacto ta mas tanto riba nos industria turistico y di aviacion, pa Aruba esaki lo por bira un reto mas grandi pa nos pais. Esaki ta demanda pa e companianan por reestablece na Aruba.
Mas cu con dificil e tempo bira, FTA lo sigui brinda su trabou y servicio na nan miembronan y duna consehonan na esta cu tin mester. E sindicalista a bisa cu cada un di nos mester cumpli cu su responsabilidad. No importa cual trabou bo tin, talbes na e momento aki bo ta trahando for di bo cas. Pero hopi ciudadano ta trahando den e instancianan esencial of vital. Esaki ta haci cu mester duna nan espacio pa nan por haci nan trabou lo miho posibel, ya cu nan ta yuda mantene funcional nos comunidad mas cu tin crisis.
Pero si mester tene cuenta cu nos mester respeta gobierno su peticion pa nos comunidad. Aworaki e por ta duro, y den caso cu e ta bira mas duro, e reto ta bira mas grandi y mester di mas comprension y sabiduria pa sali afo. Sinembargo Presidente di FTA, Hubert Dirksz, ta haya cu nos mester tin e capacidad di comparti y traha cu otro pa asina nos por sali di e situacion aki.
