2017 lo ta un aña electoral y un biaha mas e topico rond di uzo di mashin electronico di votamento ta lanta cabes. E ta necesario si of no y cual lo ta su beneficio pa nos proceso di votamento, ta preguntanan cu sigur ta valido.
Ex director di Censo na Corsou, Charles do Rego ta esun cu a bin cu e iniciativa pa introduci e mashin di votamento electronico den e isla bisiña aki.
Na aña 1998, Sr. Do Rego kende ta un profesional riba tereno di management, a confronta un votacion grandi na Corsou, caminda 14 partido a yega di participa. E echo aki a trece hopi cambio cun’e den nan sistema di votacion. E ora ey el a propone pa introduci e sistema electronico di votacion cu a hala basta atencion na Aruba cerca e clase politico. Ainda no ta conoci e cantidad di partido cu lo participa den eleccion general di otro aña.
Interes den pasado
18 aña pasa e sistema di votacion electronico tabata uno hopi nobo den nos region di Caribe, te hasta el a wordo batisa e tempo aya como “Do Rego mashin pa vota”. El a yega bin Aruba pa haci un presentacion riba e mashin di vota a base di un invitacion di un partido nobo. Despues el a realisa un presentacion den conseho di minister den compania di ex director di Censo, Roberto Pablo tempo di gobierno di gabinete Oduber.
Sr. Do Rego a bisa cu tabata existi un gran interes pero a lanta un ola di critica riba e sistema aki, pero e ta kere cu e ambiente cu a wordo lanta di critica tabata mas bien miedo pa e tecnologia y miedo pa cambio. El a bisa cu e uzo di mashin aki no ta registra niun problema, talbes algun cu otro caso na Merca
E ta kere cu e sistema di votacion electronico ta hustifica su mes, apesar cu Corsou tin un censo electoral di alrededor di 115 mil votado. Na Aruba ta menos cu esaki, pero sr. Do Rego ta haya cu tambe ta hustificabel pa nos pais introduci e sistema aki.
Inversion hustifica
Pa loke ta e parti di inversion, tin mashin mas sofistica cu otro y esaki ta influencia su balor. Na Corsou nan a cuminsa cu e sistema di esun di Hulanda cu tabata bon y relativamente barata pero pa e votado no tabatin un comprobante fuerte.
“E no ta wak esey. E hendenan cu no ta confia un mashin nan ta discuti y esaki ta haci un tiki dificil”, el a bisa.
E otro sistema ta esun Mericano cu ta wordo uza na Venezuela y otro paisnan tambe. Esaki si ta produci un papel of comprobante, pero e ta un tiki mas caro. E ta alrededor di 1 miyon florin di inversion. Pero e ta haya cu unabes e inversion ta wordo haci e pais lo tin hopi probecho di dje, pasobra nan ta spaar papel, impresion di e carchi di votacion y tur otro cos cu ta parti di e logistica di cada eleccion. El a haci un calculacion e tempo aya, y e tabata sali mas barata ya cu e mashin ta wordo uza den cada eleccion.
E ta reconoce cu e introduccion di un sistema electronico di votacion no ta un exigencia. Encuanto e sistema aki ta garantisa mas transparencia den e proceso, sr. Do Rego ta bisa cu pa medio di uzo di mashin bo no ta bay haya mas tanto votonan invalido. Pa ehempel recientemente den e proceso di sosten di lista nan a yega di confronta e echo di cantidad di voto tabata invalido.
E ta trece menos bruhamento specialmente ora cu ta un carchi di votacion grandi cu hopi hende den dje. Esaki debi cu ora nan ta marca e ronchi di e partido, nan tabata yena otro ronchinan mas chikito. Pues cada bes cu e votado ta haci algo di mas riba e carchi di votacion, e ta haci e voto invalido. Of nan ta haci uzo di otro sorto di pen pa vota y ley ta hopi stricto y e vota ta keda invalido.
“Ley ta stricto y ley mester keda stricto pasobra ta trata di un di e momentonan mas importante di nos democracia”, el a bisa. E uzo di e mashin ta haci cu e anulacion di un voto ta bira ta imposibel. Nan por haya voto blanco si, y e mashin ta duna e opcion aki, pero tambe ta un voto cu ta papia pa su mes.
El a bisa cu e sistema ta trece hopi bentaha cun’e pero mester percura cu e hendenan cu ta traha por haya un bon capacitacion y training. “Fraude bo ta haya ora cu hende kier echa un vaina”, segun sr. Do Rego.
Conseho electoral independiente
El a bisa cu cambio a wordo introduci na Corsou riba sistema di votamento, pero lamentablemente riba aspecto legal nan a keda atras. Den e caso aki e ta mira cu Aruba mescos cu St. Maarten ta mas leu cu Corsou riba tereno di ley pa regarda un proceso di eleccion. Un aspecto tin di haber cu nos tin un Conseho Electoral independiente loke Corsou no tin ainda.
Pues tin cierto desaroyo riba e materia aki cu Corsou tin y Aruba no tin, y vice versa tambe. sr. Do Redo a bisa cu nan boga y haci tur cos pa nan tin un conseho electoral independiente, y aunke nan a haya tur cos cu ta mandatorio, pero ainda e “no ta manera mester ta”.
Na final sr. Do rego a bisa cu pa garantisa un eleccion transparente cada pais mester percura pa nan ley di votacion ta bon na su luga; y banda di esey nan mester tin un bon organisacion cu hendenan hopi integro.
