AHATA, e asociacion di sector hotelero, ta preocupa cu e aumento recien den actividad criminal y e cambio den e naturalesa (caracter) di e actividad criminal.
Esaki ta un relato di parti di Ahata:
Siman pasa e compania di consultancy lider riba tereno di turismo, Resonance, a publica su rapport pa 2016 riba e cantidad y calidad di e experiencia turistico di 28 diferente isla Caribense, segun e posicion determina pa bishitantenan riba websitenan manera TripAdvisor. Tabatin un area den cual Aruba a ricibi un evaluacion fuerte y esey ta siguridad. A posiciona Aruba na e di dos luga for di tur e 28 islanan!
Sinembargo, Aruba a keda riba e di 7 luga for di e 28 islanan Caribense pa loke ta trata e calidad di cultura (9), experiencianan culinario (10), sightseeing (11), deporte y aventura (12) y acomodacion (14), cual ta net riba e averahe y entretenimento (6) a ricibi un “rating” relativamente bon, mescos cu e calidad di conexionnan di aerolinea (6). Pues ta di vital importancia pa nos haci tur loke ta posibel pa sigura cu Aruba ta sigui ofrece un experiencia sigur, tanto pa su ciudadanonan como tambe pa su bishitantenan.
Preocupa
AHATA ta preocupa cu e aumento recien den actividad criminal y e cambio den e naturalesa (caracter) di e actividad criminal. Mester atende e asunto aki mas pronto posibel y prome cu e bira un menasa mas grandi pa e bienestar di e miles di Arubano cu ta traha den e sector turistico y prome cu e tin un impacto negativo serio riba nos pilar economico primario.
AHATA ta recomenda pa dedica atencion particularmente na provee recursonan adicional na proteccion di nos fronteranan, como tambe mehoracion di e forma cu bishitantenan cu ta keda mas largo cu nan estadia ta permiti ta keda localisa, deteni y deporta.
Tambe ta conoci cu Cuerpo Policial Aruba (KPA) mester personal adicional, vehiculonan, ekiponan di computer pa combati crimen cibernetico, pero tambe mas camara di siguridad na luganan strategico. Na mes momento nos prizon, KIA, cu tin mas di 30 aña bieu, tambe ta den necesidad urgente pa renobacion y ampliacion.
Consecuentemente AHATA ta sostene e peticion di Minister di Husticia na Gobierno pa aloca fondonan adicional den presupuesto di Gobierno pa 2017 pa combati criminalidad.
Basicamente loke Resonance a haci ta repasa tur “review” di clientenan y conta e cantidad di biaha cu bishitantenan a posiciona nan experiencia como un “hopi bon” of “excelente”. E experiencianan aki ta inclui cultura, entretenimento, sightseeing, deporte y aventura, culinario (comemento) y estadia/acomodacion (hotel, resort, y otro acomodacion). Tambe nan a “rate” e calidad di conexionnan cu aerolinea (cantidad di vuelonan nonstop/directo) y siguridad (uzando e estadisticonan mas recien pa e cantidad di asesinatonan).
Ora cu e “ranking” a wordo ahusta pa e tamaño di e isla su sector turistico (p.e. e cantidad di experiencianan a wordo calcula basa riba un base di pa 100,000 bishitante), Aruba a keda den mita di e total cu un posicionamento “overall” di 14 for di 28 y cu sightseeing (22), deporte y aventura (22), culinario (18) y acomodacion (24), tur ta cay bao di e averahe.
