Tres anochi pasa durante e di dos Toque de Queda (TDQ) na Aruba, a detene dos mama di famia, 3 menor di edad y 1 yiu mayor di edad pa a viola e TDQ. Por lo menos 2 di e detencionnan aki tin probabilidad halto di ta sin base legal, mirando cu a drenta cura pa detene un mama y yiu mientras nan tabata mira con un polis femenino tabata trapa cu pia riba lomba di su bisiña. Vanessa Tjon—Kock, kende a tuma over e mando policial, a bisa cu na De Vuyst a tira piedra contra polis, cual a instiga polis pa actua cu man duro. Sinembargo e habitantenan di e bario, kendenan tur tabata mirando kico tabata pasando, ta bisa cu esey ta un mentira.
Tanto Jerischka Albertsz como su yiu, kendenan tin apenas 3 luna bibando na De Vuyst, despues di a muda di otro region di nos isla, ta admiti cu maske ta berdad cu riba mas cu un ocasion ora polis a yega di drenta den e bario, ta tira piedra riba nan, esaki no a tuma luga e anochi cu a detene Albertsz, su yiu, kende a haya un tiro un tempo pasa y ainda tin e bala den su curpa, y su bisiña Emily Alleen hunto cu su 3 yiu menor di edad.
“Te ora nan a hiba mi warda, mi a tende e storia cu polis ta culpa e señora su yiu(nan) di tira piedra. Pero ami para riba mi stupi como mirones, niun momento mi no a scucha, ni mira cu baranca a dal un auto di polis”, Albertsz a declara. Segun e mama cu recien a muda pa e bario cu tin mal fama, e cu un di su yiunan tabata mirando for di nan stupi, pues dilanti porta di cas mes, con polis tabata trata e señora cu tabata net di drenta su cas, despues di a pasa cerca un bisiña pa busca pildo pa dolor di cabes, cu maltrato y brutalidad, mirando cu a chok’e y lastr’e riba vloer. A actua mescos contra un yiu di dje cu a sali pa yuda su mama, segun Albertsz. Tur habitante cu tabata mirando a cuminsa grita di nan cas, kiermen cu ningun hende a subi caya. “E señora tabata net net canando pa su porta, tabata net 9 or y e polis a bin riba dje, bay cune suela y uza forsa. Mirando di mi porta berdad nos a bisa si por atende e señora un poco mas netjes, pasobra e tabata den drenta su cas. Nan a cuminsa aglomera y pidi mas hende uzando e argumento cu tabatin bombardeo di piedra. Di eynan nan a saca auto bin den nos direccion, pidi nos pa bay paden. Mane cu ami cu mi yiu a bira lomba, nan a lastra mi yiu prome, bay cu mi yiu homber, y na momento cu nan ta bay cune mi ta puntra pakico nan ta sacando e di dilanti e porta pa e entrada di e cura di e cas, bentando e y lastrando e.”
Segun e señora, pa e motibo cu su yiu a haya un tiro na Noord, FCCA a dicidi di swich e famia di cas. Su yiu mester a haci un operacion y ainda e tin e bala den su curpa, e mama a indica. E señora a indica cu e agente policial cu a hib’e warda no a dun’e rason dicon a detene, ni tampoco kico su nomber of fam tabata. “Si mi tabata pafo, of si mi a bay altera cu nan tambe, mi ta bisa nan cu tin rason. Pero hasta ora mi djis duna man, nan ta troce mi. Ainda tras di tralie, bo ta wordo chercha y burla. E manera con nan tabata atende e muchanan atras, nan a kita nan paña ful. Pakico?”, e señora ta puntra.
Señora Alleen di otro banda si a wordo gara pasobra e tabata dilanti su entrada di cura na momento cu a bira 9or, pero aki a hiba tambe su yiu mas grandi cu tabata purba mira con e por yuda su mama, mientras den caso di Alleen, polis a tuma su yabi di cas y drenta e cas di e señora y bay te ariba pa saca e muchanan cu tabata ayariba. “Ora nan a bin choca mi, ful e bario a reacciona. Net mi tabata drentando mi cura, nan a djis sali for di e auto bin choca mi, pusha mi na e auto, primi mi, pone nan elleboog na mi pecho, keda choca mi, choca mi, bisa mi pa cera mi smoel. Ni bon nochi nan a bisa. Nan a keda grita hende, ‘bo no ta bay drenta e auto? Cera bo smoel!’”.
Na momento cu a hiba Alleen cu su yiunan na warda, nan a pone kita tur paña, buk. Mescos a haci cu e yiunan. “Nan a keda ter un di mi yiunan pa e rabia pa nan por uza esey contra dje, pero el a keda trankil pasobra e sa kico nan kier a haci, e tin cabes. E sa con pa controla su mes. Ora nan a pasa nos cel nan a sigui hari nos. E polis no kier a duna nos su nomber, y e recherche cu a bin despues a bisa cu e por duna su inicial so.”, Alleen a declara.
Ambos declaracion di e mamanan di famia tabata indica cu mayoria polis no tabatin material di proteccion contra e virus manera mascara, handschoen, of hand sanitizer riba nan. Nan a indica cu e cel na e warda unda a tene nan, tabata hole ‘tur tipo di cos malo, sushi’. Alleen a bisa cu solamente e recherche cu a procesa nan despues tabatin handschoen bisti.
A tuma contacto cu Lito Laclé, vocero policial, cu varios pregunta referente e caso aki, pero Laclé no a contesta ningun pregunta. Ora nos reportero a yama, Laclé a nenga e yamada. A pidi e vocero suplente Liliana Rasmijn pa pidi su colega pa contesta, pero Rasmijn a bisa cu e no por obliga ningun hende pa contesta.
