Prome Minister, Evelyn Wever-Croes a expresa su preocupacion cu e situacion di e usuarionan di autobus chikito y menasa di coronavirus. E busnan ta sigui yena cu hende y hiba e personanan aki pa nan destinacion, sin tene na cuenta e medidanan di higiena sugeri pa DVG.
E prome mandatario a laga sa cu e asunto aki a wordo trata cu su colega di Transporte Publico, Chris Romero, pa bin cu un maneho riba esaki. Premier Wever-Croes contestando pregunta di Bon Dia Aruba a bisa cu e asunto aki relaciona cu e autobus chikito yen di pasahero, ta un ‘asunto cu ami mes a mira.’ E mes a spanta di mira cuanto hende ta preta ariba otro den un autobus chikito.
E ta compronde cu e servicio di transporte aki ta importante pa nos comunidad, ‘pero salud ta hopi importante. Pa atende cu e asunto delicado aki y te hasta peligroso mirando e situacion di coronavirus na Aruba.’
El a tuma contacto caba cu Romero, caminda el a duna instruccion pa su colega di transporte publico bin cu un campaña di conscientisacion pa e usuarionan di e autobusnan chikito. Pero tambe pa departamento di Transporte Publico (DTP) hala atencion di esunnan cu ta brinda e servicio aki pa comunidad.
El a bisa cu ‘si un hende no ta percura pa su propio salud, nos ta preocupa. Nos mester purba pa salud di otronan…’
