Varios siman pasa, Aruba a conoce e caso di un piscado cu a sali for di Aruba cu un grupo di amigonan den boto y el a perde den awanan teritorial di Venezuela.
Dianan despues, e tres amigo a dicidi di sali for di Aruba cu boto y bay busca nan amigo, pero nan a drenta den awanan di teritorio Venezolano di manera ilegal. Esaki a causa cu nan a keda deteni na e momentonan ey, y cu aworaki nan no por bin Aruba bek.
Tocante esaki, nan famia a haci un declaracion den un medio di comunicacion, indicando cu nan ta buscando ayudo y sosten di comunidad pa manda placa pa e piscadonan cu ta na Venezuela y asina nan por mantene na e momentonan aki cu e situacion di coronavirus y cu e fronteranan ta cera.
Di mesun manera, ayera atardi durante e conferencia di prensa di minister di Husticia, Andin Bikker y posteriormente esun di minister presidente Evelyn Wever-Croes, Bon Dia Aruba a puntra con ta sigui cu nan situacion, mirando cu nan a keda envolvi den un problema hudicial ora nan a drenta ilegalmente na teritorio Venezolano, y cu nan famia mes a pidi den un carta pa minister Bikker yuda nan resolve nan situacion.
Tocante esaki, Bikker a informa cu ora un persona sali for di frontera di Aruba, e contacto cu otro pais, den caso aki Venezuela ta bay riba nivel diplomatico consular. “E relacion cu Venezuela ta sumamente delicado” y den cuadro aki el tuma contacto cu famia y nan mester resolve esaki via Relacionnan Exterior.
Wever-Croes pa cu e caso aki el a splica cu e situacion ta hopi complica y cu a pesar di e crisis na e momentonan ak,i nan ta tumando accion den esaki pa asina nan por bin bek na Aruba.
