Ultimo noticia a drenta cu e welga general na Corsou a para. Tin un acuerdo riba mesa cu diferente proposicionnan di banda di gobierno cu e sindicatonan awor lo bay check si nan miembronan por biba cu esakinan.
Prome cu e desaroyo nobo aki Bon Dia Aruba a papia cu e Mediador di Gobierno di Aruba, Anselmo Pontilius riba e welga general na Corsou. E ta bisa cu lidernan di organisacion sindical afilia na SSK a yega di tuma contacto. E tipo di contacto aki ta na nivel di consulta, asina sr. Pontilius a declara.
“Nos tin contacto si cu e dirigentenan na Corsou pa nos sa un poco di informacion con esaki ta afecta nan. Pasobra mi ta kere cu e problema mes di e refineria practicamente nan ta resolve. Den sentido cu tin acuerdo riba e duracion di e contracto colectivo y e aumentonan salarial”, e ta declara. Den e negociacion di e CAO aki, solamente nan a pega riba e suma di placa cu hopi biaha ta e punto cu normalmente e tipo di negociacion aki ta pega.
Situacion
Sr. Pontilius ta indica cu e situacion cu a surgi na Corsou no solamente ta wordo limita na e negociacion entre trahadonan y contratista di e refineria. Sino cu Parlamento di Corsou a bin cu algun cambio di ley, cu e sindicatonan ta haya cu ta vulnera e derechonan di e trahadonan.
Un total di 11 sindicato ta afilia na Sentral Sindical di Korsou (SSK), y algun di nan ta confronta diferente caso den corte di parti di gobierno. Pero tambe e sindicatonan a yega di lanta un caso contra minister di Husticia tocante un decreto gubernamental cu ta prohibi e aglomeracion di hende.
E ta bisa tambe cu e situacion na Corsou ta un poco compleho, ya cu no solamente ta e problema di e refineria, sino cu e discusion ta rond di introduccion di ley aki cu gobierno y parlamento lo a pasa, y cu ta na punto di nan wordo ehecuta. Sr. Pontilius no ta na altura di e totalidad di e contenido di e ley controversial aki.
E ta kere cu e punto mas principal ta cu Corsou ta haya su mes cu un paro nacional cu tin su efecto pa e pais mes. Den e mesun momento ta andando e discusion riba e decreto cu e minister di Husticia a bin cun’e, y cu ta limita cierto derechonan. E ta premira cu e partidonan envolvi lo bay mesa pa sigui nan dialogo pa percura un apertura riba leynan cu e organo mas halto di e pais ta aproba. E por scucha ayera mainta cu tin disponibilidad di e Parlamentarionan pa delibera riba articulonan cu e sindicatonan ta conclui cu ta afecta e derecho di nan miembronan.
Reflexion
E ta kere cu despues di e accion di ayera lo bin un espacio di reflexion tambe. E echo cu nan ta na mesa den dialogo ta un aspecto hopi importante. Logicamente nan no por keda den dialogo permanente, y lo yega e momento cu gobernacion mester tuma un decision.
Pa contextualisa e situacion aki cu e cambio cu recientemente a tuma luga den nos codigo civil y e famoso articulo 1613X, sr. Pontilius a bisa cu tabatin discusion hopi fuerte entre minister di Labor y sindicatonan y dunado di trabou, y cu finalmente e articulo aki no a wordo cambia.
E articulo aki solamente ta existi na Aruba so di e 6 islanan di ex Antia Hulandes.
E rason cu sindicatonan a pusha pa e articulo aki drenta na vigor tabata debi na e mal uzo den e maneho laboral. Nan tabata laga un trahado drenta traha pa un cierto periodo y despues nan tabata sak’e pafo pa varios dia, y despues trece be den funcion, creando instabilidad cerca e trahadonan.
