Diaranson ultimo un rumor infunda a cuminsa circula via Whatsapp, cu e Departamento di Impuesto ta contagia cu Coronavirus y cu a pone e organisacion completa den cuarentena.
Segun e comunicado cu nos a ricibi ta indica cu Departamento di Impuesto ta lamenta y desmenti esaki completamente. Nos ta consciente cu COVID-19 por afecta un colega, cliente y/of partner strategico, sea ta den e facilidadnan di Departamento di Impuesto of cualkier otro sitio riba nos isla. Maneho di Departamento di Impuesto ta funda riba prevencion di propagacion di COVID-19 y ta tuma esaki hopi na serio. Departamento di Impuesto ta sigui e protocol estableci pa Gobierno di Aruba y pro-activamente a tuma pasonan preventivo, manera manda personanan di risico halto cas pa keda den cuarentena. Na ningun momento esaki ta implica contraccion of transmision di e virus en cuestion.
Nos prioridad como Departamento di Impuesto ta ehecuta e leynan di impuesto di nos pais y tambe como dunado di trabao, cuida semper e bienestar, salud y derecho di privacidad di cada empleado. Gerencia di Departamento di Impuesto ta lamenta e alegacionnan falso cu ta circulando. Esakinan ta genera panico, miedo y desconfiansa innecesario entre e coleganan y e contribuyentenan.
Gobierno tambe ta desmenti e alegacionanan y ta bisa cu Hulp Bestuurskantoor San Nicolas a ser drecha siman pasa y dialuna cu a pasa a desinfecta e edificio. Y asina a pone e luga den bon estado di trabao.
A pone un sistema di rotacion den e empleadonan pa evita aglomeracion y a baha e cantidad di cliente den e edificio.
Hulp Bestuurskantoor San Nicolas ta sigui protocol estableci pa Gobierno y pro-activamente a tuma pasonan preventivo, manera manda personanan di risico halto cas pa keda den cuarentena. Y esaki a sosode tambe cu un empleado cu a bishita praktijk di dokter.
Nos prioridad como Hulp Bestuurskantoor ta tene e higiena y siguridad di nos empleadonan y di nos clientenan na prome luga.
Alaves ta lamenta e alegacionnan falso cu ta circulando cual no lo tolera y esaki lo ser investiga. Esakinan ta genera panico, miedo y desconfiansa innecesario entre e coleganan y e contribuyentenan.
Por ultimo Departamento di Impuesto ta haci un suplica na comunidad di Aruba pa practica recomendacion di prevencion di Coronavirus y tambe sigui nos pagina di Facebook of bishita www.impuesto.aw pa informacion veredicto encuanto e desaroyonan relaciona cu COVID-19
