Maske anteriormente director di Departamento di Salud Publico (DVG), Jerry Staring no por a duna un suma detaya di cuanto testkit tin disponibel na Aruba pa evalua casonan posibel di Covid-19, aworaki a ofrece un poco mas transparencia, bisando cu tin ‘algun miles’ di testkit warda y cu tin mas na caminda. E director a anuncia alabes cu ta deliberando cu hospital, Asociacion di Dokter di Cas (HAVA) y Servicio di Malesanan Contagioso (DBZ) pa haci e testnan mas disponibel pa publico.
Director di DVG a splica cu no por duna un number exacto, mirando cu e ta un variabel ‘cambiando constantemente’. Staring a splica cu: “Nos tin un voorraad actualmente cu ta wanta nos hopi largo. Nos ta papiando di algun miles di testkit. Mi a caba di haya noticia cu un bestelling grandi cu nos a haci ta na caminda, cual lo duna nos un voorraad hopi amplio cu no lo caba facil ni lihe.”
Evaluando pa amplia criterio pa test
Mirando cu lo bay tin mas testkit disponibel, DVG ta den deliberacion hunto cu Hospital, HAVA y DBZ pa amplia e ‘case definition’ di hende cu ta haya oportunidad pa test. “Actualmente nos ta mantene e guidelines internacional di CDC y ECDC. E profesionalnan di HAVA, hospital y DBZ a reuni pa wak con nos por ahusta nos definicion di caso. Esey nos ta bezig ta treciendo dilanti pa cuminsa cune mas pronto cu ta posibel, pero e ta rekeri algun logistica. Nos lo cambi’e pa amplia e frecuencia y accesibilidad di testing pa purba di catch e casonan positivo di Covid-19”.
Deber social
Staring a enfatisa cu pa mantene e plamamento manehabel, nos tur tin cu cumpli cu nos deber social den e temporada aki pa asina evita cu e virus plama mucho hopi. “KPA lo tin su maneho pa handhaaf esaki, pero prome cu nos ta cuminsa pensa riba handhaving di punto di bista di husticia, nos tin cu pensa kico nos tur ta haci pa nos comunidad y kico nos ta haci pa zorg cu e virus no plama. Cuarentena ta un manera comproba pa stop di plama e virus aki. Na momento cu nos por papia cu otro over di e consecuencianan y e responsabilidad civico cu nos tin pa e cuarentena, esey lo ta un paso hopi grandi caba pa contenemento di e virus.”
