DVG a duna un actualisacion tocante COVID-19: Si comunidad no coopera Aruba por keda den ‘shut down’ completo

Ayera mainta Gobierno di Aruba conhuntamente cu Directie Volksgezondheid DVG a ofrece un conferencia di prensa pa duna un actualisacion tocante COVID-19, como tambe nan a trece dilanti e topico di cuido pa hende grandi.

Communicatie adviseur di DVG y miembro di crisis team, Jurette Croes a splica cu te ayera mainta 16 di maart ainda tabatin dos caso positivo (anochi a confirma e di tres caso), 19 caso negativo y seis caso pendiente.

El a recorda cu e sintomanan di coronavirus COVID-19 ta keintura halto, tosamento y problema pa hala rosea. Si un persona ta sinti e sintomanan aki y a bin di biahe for di un pais unda cu tin transmision di coronavirus of tambe tabatin contacto cu un persona cu tin e virus, el a informa cu mester tuma contacto cu nan cu e number 280-0101 of tambe por tuma contacto cu dokter di cas.

Croes a menciona cu na e momentonan aki esey ta e criterio cu e centro diagnostico tene na cuenta. Si e persona ta sinti malo caba, el a recomenda pa keda na cas y no sali den publico. Hende cu no ta sinti malo mester laba man frecuentemente cu awa y habon, evita di bay luganan publico cu hopi hende, no mishi cu nanishi, wowo y cara, evita di tin contacto cu hende malo y mantene distancia di un meter por lo menos, ademas di un bon alimentacion.

Di mesun manera, Croes a enfatisa cu cualkier persona por yama na e number ey, por ta turista, personanan local, cu status legal of ilegal, pa motibo cu aworaki e pais ta den un situacion di emergencia di salud nacional y nan no lo haci distincion si ta of no legalmente na Aruba.

Pa personanan cu tin malesanan cronico caba, a laga sa cu nan ta den e grupo di mas vulnerabel, pa no sali afo, keda cas.

Pa e personanan cu a caba di yega for di exterior, Croes a expresa cu na e momentonan aki aeropuerto tin un control y esey ta pa e paisnan cu no tin restriccion. Aworaki e paisnan cu tin restriccion ta paisnan Europeo. Hende cu ta bin for di otro pais lo wordo controla den cinco punto cu nan a pone pa controla temperatura di pasaheronan. Na momento cu ta mira cu un persona tin sintoma, nan ta pone un banda pa lo haci un chekeo y par di preguntanan clave. Si e persona ta cay den casonan potencial e lo wordo transporta pa haci un diagnostico y sigui cu e protocol.

El a pidi pa comunidad ta consciente, evita di sali, e suplica ta bay pa comunidad pa compronde e gravedad cu henter isla ta den dje. “Si comunidad no por compronde esaki nan lo tuma medidanan mas drastico y Aruba lo por keda den un ‘shut down’ completo.” Pero tur cos ta depende di comunidad mes pa socialisa menos y ta consciente di kico ta e efecto cu por tin cu salud.

Tocante 19 persona negativo y seis caso pendiente, Croes a confirma cu ta famianan of personanan cu a haya contacto cu e persona Arubiano cu a biaha pa New York y personal di compania WEB, kende na e momentonan aki ta den cuarentena.

Di loke ta trata e ‘call center’ – e number di telefon pa emergencia – el a señala cu nan a haya un aumento di yamadanan ‘hopi drastico’. El a pidi comprension pa esunnan cu por yama y no ta haya un contesta di biaha,,, cu no ta pa motibo cu no kier atende e caso, sino cu e yamadanan ta hopi. Hende tambe por yama nan dokter di cas.

Tocante e mascarapa tapa boca, Croes a afirma cu su uso no ta recomendabel. Si un persona ta sano, esey no ta proteha pa motibo cu e virus ta drenta den nanishi, wowo y boca, si un persona ta cana cu esey henter dia bisti pero e ta bay come sin laba man of ta bay grawata nanishi of wowo, esey no ta un articulo di proteccion.

Di su parti, Tirzlyn Kolfin WH seccion Cuido di nos grandinan a informa tocante e maneho nobo cu a wordo tuma diasabra ultimo y cu a cuminsa na vigor diadomingo ultimo. El a manifesta cu na base di calamiteitenverordening nan a bin cu un maneho per direct pa stop bishitanan na tur e casnan di cuido. El a menciona cu esaki ta un maneho pa proteha nos hende grandi, mirando cu nan ta e grupo mas vulnerabel.

Asina mes, Kolfin a comenta cu tur cas di cuido a coopera desde cu nan a haya e informacion aki y tuma e medidanan necesario pa nan mes y evita cu hende grandi por wordo infecta.

El a haci un peticion pa pueblo di Aruba pa yuda tene e responsabilidad hunto pa preveni y cuida e hende grandi.