Ya caba e efectonan colateral di e coronavirus ta wordo sinti riba mercado laboral. Reunion ta tumando luga pa asina bin cu un plan di contingencia pa evita cu cantidad di trahadonan ta wordo manda cas sin pago.
Mediador di Gobierno, Anselmo Pontilius a bisa cu diasabra ultimo minister di Labor a convoca corectamente un reunion cu e gremio di dunado di trabou y sindicato cu a continua ayera tardi. E intencion tras di e tipo di reunion aki ta di por yega na proposicion concreto y cu na caminda nan ta wordo adapta.
Pero mas cu tur cos e trahadonan cu ya a yega di perde trabou of cu ta na peliger di keda sin trabou, lo desea di por scucha un mensahe di aliento cu nan por tin un pida pan na mesa. Tin varios formula cu por wordo hinca den otro, pero e no ta un proceso facil, Pontilius a laga sa.
Tambe mester evalua con pais Aruba por yega na fondonan – sin descarta Hulanda y Union Europeo – pa percura cu e trahadonan por tin un entrada. Pontilius a referi riba e posibilidad di por yega un poco na e tipo di acuerdo nacional cu a wordo logra entre 1985/86, ora cu refineria Lago a cera.
E biaha ey institucionnan financiero y banconan, pero tambe companianan di utilidad a cera cabes pa atende e crisis ey.
E tempo aya cu refineria Lago a cera, Aruba a perde entre 30 pa 40 porciento di su ingreso. Aunke e ta reconoce cu e biaha aki e situacion ta otro, cu e ta considera hopi mas drastico. Awe nos poblacion ta mas grandi. Ademas e tempo aya, esun cu a perde trabou por busca alternativa den otro paisnan pa busca un oferta laboral. E posibilidad aki no ta existi actualmente.
Trahadonan manda cas
For di siman pasa informacion a cuminsa drenta indicando cu un cantidad di trahado lo ta bayendo cas, perdiendo trabou. Pontilius a declara cu un compania so di uitzendbureau entre diahuebs pa diabierna a haya notificacion cu 100 di su trahadonan no ta necesario na pia di trabou.
E prome grupo di trahado cu ta wordo manda cas ta esunnan subcontrata of e trahadonan cu ta traha via companianan di uitzendbureau of cu ta traha los. Esaki no ta kita cu e companianan uitzendbureau of subcontratista tambe tin un responsabilidad cu e trahadonan.
Sinembargo mirando e situacion mundial cu a surgi debi na e virus aki, esaki tambe ta afecta nos ocupacion di hotel cu a cuminsa cay na un nivel nunca bisto. Esaki a conduci cu ya caba e hotelnan a bisa na e companianan di uitzendbureau cu nan no mester di e trahadonan aki. Mayoria di hotelnan ta bin aumentando e uso di trahadonan aki, particularmente durante temporada halto cu nos ta actualmente.
“Esaki kiermen cu tin consecuencianan grave. Pues ta importante pa sigui atende cu e situacion socioeconomico, debi cu e companianan no lo tin entrada. Y dificilmente un persona sin trabou por haya un suma di onderstand di gobierno cu por sobrevivi cu su debenan. Pues e reto tin di haci cu mester preveni cu mas trahadonan lo perde nan trabou y esaki ta demanda con creativo nos ta bay ta pa atende cu e situacion aki.
Igualmente, Pontilius a probecha pa haci un apelacion na comunidad henter pa tuma na serio tur e medidanan di higiena cu ta wordo recomenda pa nos autoridadnan di salubridad, pa preveni un brote masal di coronavirus. Pero tambe pa para keto y mustra nos solidaridad cu otronan, specialmente esunnan mas vulnerabel di nos comunidad.
