Autoridadnan na Puerto Rico a duna boet na mas di dos decena di negoshi ayera, y a aresta un homber acusa di no cumpli cu e toque de queda (curfew) recien imponi, mientras gobierno a pone medidanan fuerte cu meta di combati coronavirus den e teritorio Mericano.
Oficialnan a anuncia cu Guardia Nacional lo cuminsa screen pasaheronan yegando na aeropuerto principal di Puerto Rico, y cu gobierno lo tene tur reunion y conferencia di prensa unicamente online.
Algun empleado den sector priva a keha cu nan hefe tabata duna nan orden pa bay traha a pesar di e curfew, impulsando gobierno pa urgi tur trahado no esencial pa keda cas.
Secretario di Estado di Puerto Rico, Elmer Roman tambe a adverti cu ningun persona ta permiti pa bay beach, clarificando un orden ehecutivo di diadomingo, cu a causa confusion. “Desafortunadamente, turistanan mester keda den nan camber”, el a bisa.
Roman a bisa residentenan local: “Boso lo keda den boso cas a menos cu boso ta bay cumpra cuminda of medicina. Hende mester compronde cu esaki ta algo serio.”
El a adverti cu polis lo duna boet na individuo, no unicamente negoshinan acusa di viola e orden. Oficialnan a cuminsa shift di 12 ora pa sigura cu hende cumpli cu e curfew, cu violadonan enfrentando un sentencia di seis luna di prizon, of un boet di hasta $5mil.
Polis a bisa cu a aresta Luis Ortiz di pueblo central di Orocovis, kende ta doño di bar Legacy den un bario yama Black Cat. E aresto a produci un dia despues cu gobernador Wanda Vazquez a duna orden pa cera oficina no esencial di gobierno y negoshinan comercial cu excepcion di pompstation y esunnan den sector cuminda, salud y finanzas.
Puerto Rico a reporta cinco caso confirma di novel coronavirus.
