Sector hotelero a cuminsa sinti efecto di coronavirus

Sector turistico y hotelero ta esunnan mas afecta den e situacion di COVID-19. Na Corsou mes e impacto ta calcula pa un perdida di 20 miyon dollar den e siman aki.

Luigi Heredia, presidente di Aruba Timeshare Association y resort manager di Costa Linda Resort a duna di conoce cu na e momentonan aki e asociacion ta pasando den un momento di ‘resiliencia’ manera e mes a sigura.

Asina mes, Heredia a bisa cu nan a pasa esaki otro biaha, tempo di desaparicion di Natalee Holloway, y nan mester sigui keda positivo.

Loke nan ta discutiendo awor, Heredia a bisa cu nan no kier tuma e situacion aki manera algo social pa empleadonan, pa motibo cu si nan ta baha e cantidad di trahadonan, esey lo crea un situacion di problema social y nan no kier esey. Nan ta percura pa mantene tur empleado lo mas posibel na trabou. E motibo di esaki ta cu nan no kier manda empleado cas pa motibo cu nan lo keda sin entrada of sin salario.

Di loke ta trata e contratistanan cu nan ta emplea, Heredia a informa cu nan ta mescos cu empleadonan mes di hotel, nan tambe tin famia y mester di su salario.

“E problema aki no ta algo di un plaso solamente, esaki ta algo cu lo dura un largo tempo”, Heredia a confirma.

El a splica cu timeshare (miembresia) ta algo diferente di loke ta trata hotelnan, miembronan a paga esaki caba desde hopi aña y nan por maneha mas cu un hotel.

Asina mes, Heredia a confirma cu e dianan aki nan a haya un cancelacion di reservanan di turista. Siman pasa na Costa Linda el a manifesta cu e capacidad tabata 98% di ocupacion y e siman aki nan a baha pa 78%, loke ta nifica un 20% caba di cancelacion.

Tambe el a sigura cu e cifra aki por aumenta mas den transcurso di siman, pero nan ta tumando tur e medidanan cu Gobierno a implementa y nan ta bezig cu loke ta trata limpiesa den hotel, pa haci esey un tiki mas profundo.

“Esaki ta un situacion dificil.” Heredia a comunica cu nan kier pa comunidad sa cu no mester haya miedo di e situacion aki, esaki lo bay pasa y mester tene na cuenta e comunidad y no haci comprasnan nervioso, mester tin cautela.