Ayera nochi, Gobierno di Aruba a ofrece un conferencia di prensa ‘Extraordinario’ pa e medionan di comunicacion local den cual a duna un actualisacion tocante e situacion na Aruba y ultimo medidanan cu a tuma relaciona cu coronavirus.
Prome minister Evelyn Wever-Croes hunto cu ministernan di Comunicacion, Transporte, Turismo y Deporte, como tambe directornan di instancianan concerni, a ofrece un actualisacion pa loke ta trata e desaroyo di e virus denomina COVID-19.
Minister presidente a anuncia cu e cantidad di caso a keda na dos, no tin otro persona contagia desde diabierna ultimo cu nan a haci e anuncio oficial y esey ta algo cu nan ta monitor di cerca.
Bintidos hende a haci e test y tur a duna como resultado negativo pa e virus, pero tur dia nan ta sigui cu e protocol pa cu esaki y duna informacion pa comunidad.
Ademas, Wever-Croes a anuncia cu despues di un consulta cu gremio sindical y cu gremio comercial, nan a dicidi di prohibi entrada aereo pa tur pasahero di tur pais cu no ta residente di Aruba. Esaki lo drenta na vigor diamars 17 te cu 31 di maart di e aña aki, por lo pronto te cu nan evalua atrobe e medidanan.
E medida ta conta pa pasaheronan, bishitante y turistanan di Merca, Canada, Latino America y islanan Caribense. Wever-Croes a informa cu esaki ta pa motibo cu nan kier sigui traha y haci tur esfuerso pa sigui contene cu e virus aki, pa preveni su expansion.
“Awor e ta conteni, nos ta keda monitor cada rato y nos kier sigui contene esaki”, Wever-Croes a anuncia.
Otro di e motibonan pakico nan a tuma e medidanan ayera nochi ta cu mester a tuma e decision aki di forma rapido, y mas nan ta tarda mas chens tin di haya mas problema di salubridad publico, y economia tambe por bay mas atras.
Tin excepcion pa carga cu lo sigui drenta na Aruba, pa motibo cu e prohibicion no tin nada di haci cu carga. Tambe pa loke ta trata turistanan cu mester bay bek na nan pais y ta keda un excepcion pa residentenan di Aruba, kende mag di bin bek.
Wever-Croes a trece dilanti un conseho pa henter comunidad di Aruba no biaha mas, y pa Arubianonan cu ta den exterior bin bek lo mas pronto posibel, pasobra nan ta tene cuenta cu e posibilidad cu e aerolineanan por stop e vuelonan y e residentenan mester por bin Aruba.
Asina mes, Wever-Croes a comenta cu ‘no ta parce cu tur hende ta compronde e seriedad di e situacion cu nos ta aden, e comportamento di cada ciudadano na Aruba mester cambia’. Esaki pa motibo cu nos kier bringa cu e virus aki pa no plama mas y pa e pais por sali exitoso di e situacion actual.
“Nos mester tuma un distanciamento social” el a sigura, hende no mester bay luganan cu tin hopi hende, fiesta of eventonan asina. Ya caba tin un prohibicion pa actividadnan social, publico, y deportivo, pero asina mes nan a ripara cu e comportamento di hende no ta cambia.
“Nos mester di cada ciudadano na Aruba pa su cooperacion, cambio di comportamento. Esaki no ta momentonan pa fiesta, nos mester detene esaki y nos mester di bo”, Wever-Croes a manifesta.
Tambe minister presidente a anuncia cu Gobierno di Aruba como dunado di trabou a tuma cierto decisionnan y a comunica cu tur hefe y director di departamento cu desde awe lo purba e distanciamento social. Percura pa no tin hopi hende den mesun caminda, nan a pidi pa tur hefe di persona sinta cu su trahadonan y yega na un areglo pa traha for di cas, traha via telefon, via e-mail of cambia orarionan cu ta atende publico y limita publico cu lo wordo atendi.
Departamentonan di Gobierno no lo cera, servicionan ta continua y sinembargo nan no por expone trahadonan pa situacionnan cu no por contene.
Asina mes, Wever-Croes a pidi pa sector priva e mesun cooperacion pa e trahadonan, pa asina no haya aglomeracion di hende, traha for di cas, usa tur manera posibel pa evita cu e virus lo sigui plama.
