Hefe di departamento di Malesa Contagioso (DBZ), Sharline Koolman a haci un yamado categorico pa esunnan cu actualmente a wordo poni den cuarentena. E yamado ta pa nan sea responsabel y cumpli cu tur e rekisitonan cu e departamento di Salubridad Publico (DVG) a exigi for di nan.

Unabes cu nan a haya un lista di 13 persona for di WEB cu tabatin contacto directo cu e consultant Mericano – un di e dos pashent cu a test positivo pa coronavirus na Aruba – nan a wordo poni den cuarentena den nan respectivo cas como medida di prevencion. Tur dia nan ta wordo monitor.

Te diasabra ultimo niun di nan a presenta e sintomanan di e coronavirus, kiermen nan no por contagia niun hende. Pero si nan mester ta cera den nan cas, y tene cuenta cu tur rekisitonan duna pa DBZ, specialmente pa no bay den publico, ni sikiera pa bay haci compras.

El a bolbe haci un apelacion na e personanan aki cu a keda den cuarentena. Nan kier evita cu DBZ lo haya informacion di WEB cu esaki no ta sucediendo. “Nos kier cana prome cu un cos bay robes,” el a declara na Bon Dia Aruba. Esaki ta conta pa cualkier otro caso di e mesun indole.

Koolman a haci un suplica, pero tambe un peticion drastico, pa por fabor nan cumpli cu e instruccionnan cu nan a ricibi for di departamento di Salud Publico. “Si bo a wordo pidi pa keda cas den cuarentena ta pa un motibo. Locual mi a compronde ta cu niun tin sintoma ainda.” Sinembargo e no ta haya cu esaki ta un motibo pa bo bay cana rond. El a aclaria cu e famia di hendenan cu ta den cuarentena por keda cu nan, tanten cu nan no tin sintomanan, ya cu sin sintomanan e virus no ta pega.

Den esaki e ta haya cu como departamento di Salubridad Publico, nan ta haci nan parti, pero pueblo mester cumpli cu su parti. El a bisa cu si un persona ta wordo instrui pa keda na cas como un eventual sospechoso di e virus, por fabor cumpli cu exigencia aki. E tabata categorico di bisa cu como autoridad di salud nan tin autoridad pa bin cu medidanan mas drastico, pero e ta kere cu nos ta biba den un pais hopi civilisa, y cu no mester bay den e direccion di bin cu medidanan mas estricto. Specialmente pa bo no bira un factor di riesgo pa hendenan cu ta mas vulnerabel, entre nan hendenan di edad avansa of hendenan cu malesa cronico.

Si e persona cu a wordo isola mester di mas informacion, por yama e number di contacto cu a wordo duna hunto cu tur e instruccionnan. Tambe por yama e call center 280-0101 si acaso kier mas informacion.